×
A
A
A
Sazlamalar

Almaniyanın rəsmi qurumlarına və siyasi partiyalarına “CRONIMET” şirkəti ilə bağlı müraciət edilib

Bakı, 10 iyul, AZƏRTAC

Almaniyadakı Azərbaycan Evləri ölkəmizin ərazisindən keçən və Araz çayına tökülən Oxçuçaya qarşı Ermənistan və Almaniya şirkətlərinin törətdikləri ekoloji cinayətlə bağlı bu ölkənin dövlət qurumlarına və ictimaiyyətinə müraciət edib.
Diasporla İş üzrə Dövlət Komitəsinin mətbuat xidmətindən AZƏRTAC-a bildirilib ki, Almaniyanın “CRONIMET” şirkətinin baş ofisinə, “Yaşıllar Partiyası”na, “Greenpeace” və ətraf mühitin mühafizəsi üzrə digər beynəlxalq təşkilatlara, müvafiq dövlət qurumlarına ünvanlanan etiraz xarakterli bəyanatlarda dəhşətli fəlakət bütün təfərrüatı ilə təsvir edilib. Səhmlərinin əsas hissəsinin Almaniyanın “CRONIMET” şirkətinə məxsus olduğu Ermənistanın mis-molibden kombinatının təmizləmə işləri aparılmadan, zəhərli tullantılarını birbaşa Oxçuçaya buraxdığı, ekoloji standartlara riayət edilmədiyi və Azərbaycanın ətraf mühitinə misli görünməmiş zərbə vurulduğu nəzərə çatdırılıb.
Bəyanatlarda “CRONIMET” şirkətindən və digər müvafiq dövlət qurumlarından, beynəlxalq təşkilatlardan bu ekoloji cinayətə biganə qalmamaq və fəlakətin qarşısını almaq məqsədilə dərhal lazımi tədbirlər görmək tələb edilib.

Diaspor 2021-07-10 20:25:00