Bakı, 21 may, AZƏRTAC

Göygöl rayon sakini S.Həsənovun avtomobilini qaçıran dayısı Ə.Əsgərov avtomobillə birgə Şəmkir rayonu ərazisində saxlanılıb.
Daxili İşlər Nazirliyinin mətbuat xidmətindən AZƏRTAC-a bildiriblər ki, Göygöl Rayon Polis Şöbəsinə müraciət edən Üçtəpə kənd sakini S.Həsənov kənd ərazisindən “VAZ-2106” markalı avtomobilinin qaçırılması barədə məlumat verib.
Polis əməkdaşlarının keçirdikləri əməliyyat-axtarış tədbirləri nəticəsində nəqliyyat vasitəsinin S.Həsənovun dayısı, əvvəllər məhkum olunan Ə.Əsgərov tərəfindən qaçırılması müəyyən edilib və o, avtomobillə birgə Şəmkir rayonu ərazisində saxlanılıb.
Faktla bağlı araşdırma aparılır.