×
A
A
A
Sazlamalar

Bakı Slavyan Universitetinin şöbə müdirinin külli miqdarda təhsil haqqını mənimsəməsi ilə bağlı cinayət işi başlanıb

Bakı, 29 aprel, AZƏRTAC

Azərbaycan Respublikasının Baş Prokurorluğu Bakı Slavyan Universitetinin (BSU) şöbə müdirinin qanunazidd əməlləri ilə bağlı bəzi kütləvi informasiya vasitələrində yayılan xəbərlərə münasibət bildirib.
Baş Prokurorluğun mətbuat xidmətindən AZƏRTAC-a bildiriblər ki, bəzi KİV-lərdə BSU-nun Əlavə və qiyabi təhsil şöbəsinin müdiri Dürdanə Əliyevanın külli miqdarda təhsil haqqı məbləğlərini mənimsəməsinə və bunun da həmin təhsil ocağının tələbələrinin narazılığına səbəb olmasına dair məlumatlar yayılıb.
Dürdanə Əliyevanın həmin qanunsuz əməlləri törətməsi barədə Bakı Slavyan Universitetinin tələbələrindən daxil olmuş çoxsaylı şikayətlər əsasında Baş Prokuror yanında Korrupsiyaya Qarşı Mübarizə Baş İdarəsində araşdırmalar aparılmaqla Cinayət Məcəlləsinin 178.3.2-ci (dələduzluq külli miqdarda ziyan vurmaqla törədildikdə), 32.4, 312.2-ci (rüşvət verməyə təhrik etmə), 311.1-ci (rüşvət alma) maddələri ilə cinayət işi başlanıb.
Hazırda iş üzrə intensiv istintaq tədbirləri aparılmaqla toplanmış sübutlara hüquqi qiymətin verilməsi və bu barədə ictimaiyyətin yaxın zamanda ətraflı məlumatlandırılması təmin ediləcək.

Hadisə 2021-04-29 15:56:00