Yaponiyada yeni daşıyıcı raket ictimaiyyətə təqdim edilib
Tokio, 17 mart, AZƏRTAC
Martın 17-də Yaponiya Aerokosmik Məkanın Tədqiqi Agentliyi (JAXA) yeni ikipilləli H-III daşıyıcı raketini ictimaiyyətə təqdim edib.
AZƏRTAC xəbər verir ki, bu barədə agentliyin rəsmi saytında məlumat yerləşdirilib.
Bildirilir ki, daşıyıcı raket Yaponiyanın cənub-qərbində yerləşən Taneqaşima kosmodromunun ərazisində yerləşdirilib. Hazırda H-III raketinin maye hidrogen yanacağı ilə doldurulması və digər texniki yoxlamalar həyata keçirilir. Yeni daşıyıcı raketin 2021-ci maliyyə ili ərzində ilk buraxılışının baş tutacağı gözlənilir.
Qeyd edək ki, H-III Yaponiyaya məxsus maye yanacaqla işləyən böyük raket daşıyıcısıdır. Onun uzunluğu 63 metrə, diametri isə 5,2 metrə bərabərdir. Yeni raketin Günəş sinxron orbitə 4 ton, geokeçici orbitə isə 6,5 tondan çox ağırlığında yük çıxaracağı gözlənilir.
Kyodo agentliyinin bildirdiyinə görə, H-III daşıyıcı raketi sələfi olan H-IIA raketindən təqribən 1,3 dəfə çox ağırlığında süni peykləri orbitə çıxaracaq. Bununla bərabər, konstruksiyada aparılmış sadələşdirmələr nəticəsində raketin hər buraxılışının dəyəri H-IIA ilə müqayisədə təqribən 50 faiz və ya 5 milyard yen (45,8 milyon dollar) ucuz başa gələcək.
Vüqar Ağayev
AZƏRTAC-ın xüsusi müxbiri
Tokio
Antarktidada 20 qolu olan çiyələyə bənzər dəniz canlısı kəşf edilib
Ölü balinanın mədəsində 500 min avro dəyərində “üzən qızıl” tapılıb
Alim ölü kaşalotun içərisində 500 min avro dəyərində xəzinə aşkar edib