İsmayıllı, 6 mart, AZƏRTAC İsmayıllıda 5 mart - Bədən Tərbiyəsi və İdman Günü münasibətilə rayonun idmançı və məşqçi müəllimləri ilə görüş keçirilib.

AZƏRTAC-ın bölgə müxbiri xəbər verir ki, tədbir iştirakçıları öncə ümummilli lider Heydər Əliyevin abidəsini ziyarət edib, heykəlin önünə gül dəstələri qoyublar.
Heydər Əliyevi Mərkəzində karantin rejimi qaydaları gözlənilməklə təşkil olunan tədbirin iştirakçıları burada İsmayıllı idmançılarının respublika və beynəlxalq yarışlarda qazandıqları mükafatların sərgisi ilə tanış olublar.
Görüşdə Azərbaycan Respublikasının Dövlət Himni səsləndirilib, Vətən müharibəsində şəhid olanların xatirəsi bir dəqiqəlik sükutla yad edilib. Rayon icra hakimiyyətinin başçısı 5 mart - Bədən Tərbiyəsi və İdman Günü münasibətilə iştirakçıları təbrik edib, Prezident İlham Əliyevin ölkəmizdə idmanın inkişafına göstərdiyi diqqət və qayğısını qeyd edərək bildirib ki, bu gün Azərbaycan dünyada tanınan idman dövlətlərindən biridir.
Tədbirdə idmanın müxtəlif növləri üzrə rayonda yaradılan mövcud şəraitdən, İsmayıllı gənclərinin respublika və beynəlxalq yarışlarda qazandıqları uğurlardan danışılıb.