Azərbaycan Dövlət
İnformasiya Agentliyi

A
A
A
Sazlamalar

Milli Olimpiya Komitəsi idmançılara dəstək məqsədilə İKT və ingilis dili təlimlərinə start verib

Bakı, 26 noyabr, AZƏRTAC

Azərbaycan Milli Olimpiya Komitəsi (MOK) Beynəlxalq Olimpiya Komitəsinin (BOK) idmançılarla işin gücləndirilməsi, o cümlədən müxtəlif sahələrdə bilik və bacarıqlarının artırılması istiqamətində onlara əlavə imkanların yaradılması tövsiyələrini nəzərə alaraq layihələr reallaşdırır.
AZƏRTAC xəbər verir ki, MOK idmançılar üçün üç istiqamətdə - psixoloji dəstək, ingilis dilində danışıq və İKT sahəsində bacarıqların təkmilləşdirilməsi üçün kurslara start verib. Hər üç istiqamətdə təlimlərə qatılacaq idmançılar və təlimçilərlə keçirilən görüşdə MOK marketinq idarəsinin rəhbəri Mehman Kərimov BOK-un 2019-cu il aprelin 14-də Lozannada baş tutan Atletlər Forumunda üzv ölkələrin olimpiyaçıları üçün əlavə bilik və bacarıqların verilməsinə imkan yaradan fəaliyyət növlərinin, həmçinin idman qərarlarının qəbulunda idmançıların aktiv iştirakının müəyyənləşdirilməsi gündəliyinin əsas mövzusu olduğunu bildirib.
Bu ilin birinci rübündən başlayan pandemiya qeyd olunanları həm BOK, həm də MOK qarşısında daha aktual və ciddi məsələyə çevirib. İlkin mərhələdə 30 idmançı üçün nəzərdə tutulan təlim kursları cari ilin sonunadək davam edəcək. Eksperimental xarakter daşıyan təlimlərin qiymətləndirilməsindən sonra növbəti il üçün forma və mövzu ilə bağlı qərar veriləcək. BOK-un maliyyə dəstəyi ilə həyata keçirilən təlimlərin 2024-cü ilə qədər davam edəcəyi planlaşdırılır.

İdman 2020-11-26 15:11:00