Bakı, 21 oktyabr, AZƏRTAC
İspaniyanın “Barselona” futbol klubunun hücumçusu Ansu Fati UEFA Çempionlar Liqasında yeni rekord müəyyənləşdirib.
AZƏRTAC xəbər verir ki, 17 yaşlı futbolçu buna ötən gün “Ferensvaroş”la matçda (5:1) qol vurmaqla nail olub. Turnirdə ilk dəfə ötən il dekabrın 10-da “İnter”lə görüşdə fərqlənən ispaniyalı yarımmüdafiəçi UEFA Çempionlar Liqasında 18 yaşı tamam olmamış 2 qol vurmağı bacaran ilk futbolçu kimi rekorda imza atıb.
A.Fati ötən ildən Kataloniya klubunun əsas komandasında çıxış edir. O, cari mövsümdə La Liqada 4 oyuna çıxaraq 3 qol vurub.
Xatırladaq ki, hücumçu İspaniya millisinin heyətində UEFA Millətlər Liqasının Ukrayna ilə matçında fərqlənərək, yığmada qol vuran ən gənc futbolçu adına da yiyələnib.