Qəbələ, 12 oktyabr, Mustafa Dadaşov, AZƏRTAC

Qəbələ rayonunun torpaq mülkiyyətçiləri builki mövsümdə 401 hektar sahədə tərəvəz yetişdiriblər. Təsərrüfatlarda tərəvəz məhsullarının yığımı artıq başa çatıb. Fermerlər bu il 3 min 555 ton tərəvəz istehsal ediblər. Hər hektarın orta məhsuldarlığı 88,6 sentner olub.
Bu barədə AZƏRTAC-ın bölgə müxbirinə Qəbələ Rayon Statistika İdarəsindən məlumat verilib.
Bildirilib ki, rayonda kartof yığımı da başa çatıb. Torpaq mülkiyyətçiləri cari ildə 408 hektar kartof sahəsindən 3 min 125,6 ton məhsul əldə ediblər. Hər hektardan orta hesabla 76,6 sentner kartof tədarük olunub.
Rayonda meyvə, giləmeyvə, üzüm, dən üçün qarğıdalı və tütün yığımı davam edir. Hazırda rayon ərazisində 8 min 887,5 hektar meyvə və giləmeyvə bağları var. İndiyədək bu bağlardan 11 min 402,8 ton məhsul yığılıb.