Şəkidə gələn ilin məhsulu üçün payızlıq dənlilərin səpininə başlanılıb
Şəki, 30 sentyabr, Mustafa Dadaşov, AZƏRTAC
Respublikanın ən iri taxılçılıq rayonlarından olan Şəkidə növbəti ilin məhsulu üçün 65 min hektar sahədə payızlıq dənlilərin səpini proqnozlaşdırılır. Rayonun Suçma, Baş Göynük, Bolludərə, Qayabaşı kəndlərinin və Turan qəsəbəsinin ərazilərindəki təsərrüfatlarda bir neçə gündür ki, arpa səpininə başlanılıb. İlk günlər bu ərazilərdə 280 hektara yaşıl yem üçün xəsil və 120 hektara dən üçün arpa səpilib.
Bu barədə AZƏRTAC-ın bölgə müxbirinə Şəki Dövlət Aqrar İnkişaf Mərkəzinin bitkiçilik sektorunun müdiri Sahib Abdulhəmidov məlumat verib.
Sektor müdiri bildirib ki, payızlıq dənlilərin səpini üçün indiyədək təsərrüfatlarda 39,5 min hektar sahədə şum qaldırılıb. Səpin üçün 13,5 min ton arpa və buğda toxumu tələb olunur. Hazırda toxumçuluq təsərrüfatları tərəfindən səpin üçün ayrılmış toxumun təmizlənərək dərmanlanması prosesi aparılır. Səpində iştirak edəcək traktor və toxumsəpən aqreqatlar təmir olunaraq saz vəziyyətə gətirilir. Əkin kampaniyasına 133 ədəd şum traktoru, 92 ədəd toxumsəpən aqreqat və digər texnikalar cəlb edilib.
Ağstafada Aqrar İnnovasiya Festivalı çərçivəsində toxum sərgi-satış yarmarkası təşkil olunub
Bu il Oğuzun taxıl sahələrində orta məhsuldarlıq 30,9 sentner olub
Balakənli fermerlər 7819 hektar sahədə dən üçün qarğıdalı yetişdiriblər
Bu il Beyləqanda 23 min tondan çox pambıq istehsalı gözlənilir
Qəhvəyi mərmər bağacığını aşkar etmək məqsədilə Şəkinin kəndlərində 100 feromon tələ asılıb