Rabat, 19 sentyabr, AZƏRTAC 

Mərakeşin dörd imperiya şəhərindən biri – COVID-19 pandemiyasının dağıdıcı nəticələrindən xüsusilə çox zərər çəkmiş Mərrakeş şəhəri turizm fəaliyyətini dirçəltmək məqsədilə gələn ildən etibarən qlobal tədbirlərin təşkilini bərpa edəcək.
AZƏRTAC xəbər verir ki, hakimiyyət orqanlarının fikrincə, bu tədbirlərin keçirilməsi sayəsində şəhər mühüm hadisələr və işgüzar turizm üzrə beynəlxalq paytaxt statusunu qaytaracaq. Pandemiyadan əvvəl Mərrakeş BMT-nin iqlim dəyişmələri məsələləri üzrə COP 22 Ümumdünya Konfransı (2016-cı il), İnsan Haqları uğrunda Ümumdünya Forumu (2018-ci il), habelə futbol üzrə klublararası dünya çempionatı (2013-cü il) kimi qlobal tədbirlər təşkil edilməsi sayəsində belə bir status qazanmışdı.
2021-ci ildə Mərrakeşdə keçiriləcək iki prestijli beynəlxalq tədbir turizm və məşğulluq baxımından şəhərə və regiona hökmən müsbət təsir göstərəcək. Söhbət gələn ilin sentyabr ayında Ümumdünya Turizm Təşkilatının Baş Assambleyasının 24-cü sessiyasından və gələn il oktyabr ayında keçirilməsi nəzərdə tutulan Dünya Bankının və Beynəlxalq Valyuta Fondunun illik görüşündən gedir.
Bu iki mühüm hadisənin şəhərin turizm ekosisteminə gətirəcəyi birbaşa və dolayı üstünlüklərdən əlavə onlar həm də Mərrakeşin kommunikasiyası üçün strateji imkan olacaq, beynəlxalq arenada ona nadir şans yaradacaq.
Nigar Cəfərli
AZƏRTAC-ın xüsusi müxbiri
Budapeşt