Bakı, 18 sentyabr, AZƏRTAC
Sentyabrın 18-də Şamaxı regional “ASAN xidmət” mərkəzində “Əbədi nəğmələr” adlı konsert proqramı təşkil olunub.
Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyindən AZƏRTAC-a bildirilib ki, dahi bəstəkar Üzeyir Hacıbəylinin anadan olmasının 135 illiyinə və Milli Musiqi Gününə həsr edilən tədbir “ASAN Könüllüləri” Təşkilatının “Mədəniyyət Carçısı” proqramı tərəfindən “Könüllülər ili” çərçivəsində təşkil olunub.
Pandemiya şəraitində mövcud preventiv tədbirlərin şərtlərinə uyğun olaraq reallaşdırılan konsertdə təşkilatın musiqi qrupu tərəfindən "O olmasın, bu olsun" və "Arşın mal alan" operettalarından parçalar və xalq mahnıları ifa olunub.