Bu ilin yeddi ayında ölkədə elektrik enerjisi istehsalı artıb
Bakı, 13 avqust, AZƏRTAC
Energetika Nazirliyi bu ilin yanvar-iyul aylarında Azərbaycan üzrə elektrik enerjisinə dair operativ məlumatları açıqlayıb.
Nazirlikdən AZƏRTAC-a bildirilib ki, cari ilin yanvar-iyul ayları üzrə elektrik enerjisinə dair operativ məlumatlara əsasən, iyulda respublika üzrə elektrik enerjisinin istehsalı 2395,1 milyon kilovat/saat, ixracı 110,7 milyon kilovat/saat, idxalı 15,9 milyon kilovat/saat olub. 2019-cu ilin müvafiq dövrü ilə müqayisədə iyulda respublika üzrə elektrik enerjisinin istehsalı 26,2 milyon kilovat/saat, ixrac 9 milyon kilovat/saat artıb, idxal isə 2,6 milyon kilovat/saat artıb.
Cari ilin yanvar-iyul aylarında isə respublikada elektrik enerjisinin istehsalı ötən ilin müvafiq dövrü ilə müqayisədə 96 milyon kilovat/saat artaraq 15346,9 milyon kilovat/saat olub.
Hesabat dövründə ötən ilin 7 ayına nisbətən elektrik enerjisinin istehsalı İES-lərdə 381,5 milyon kilovat/saat artaraq 14358,9 milyon kilovat/saat, SES-lərdə 277,4 milyon kilovat/saat azalaraq 774,5 milyon kilovat/saat, digər mənbələr (KES, GES və BMTYZ) üzrə isə 8,1 milyon kilovat/saat azalaraq 213,5 milyon kilovat/saat olub. Külək Elektrik Stansiyalarında 63,03 milyon kilovat/saat, Günəş Elektrik Stansiyalarında 28 milyon kilovat/saat, Bərk Məişət Tullantılarının Yandırılması Zavodunda 122,5 milyon kilovat/saat elektrik enerjisi istehsal edilib.
Yanvar-iyul aylarında elektrik enerjisinin istehsalı “Azərenerji” ASC üzrə 13726,7 milyon kilovat/saat (İES-lərdə 13086,6 milyon kilovat/saat, SES-lərdə 640,1 milyon kilovat/saat), Naxçıvan MR Dövlət Energetika Xidməti üzrə 243,6 milyon kilovat/saat (İES-lərdə 98,6 milyon kilovat/saat, SES-lərdə 120,9 milyon kilovat/saat, Günəş ES-də 24,1 milyon kilovat/saat), Müstəqil Elektrik Stansiyaları üzrə 1376,6 milyon kilovat/saat təşkil edib.
Bu dövrdə elektrik enerjisinin ixracı 731,8 milyon kilovat/saat olmaqla, 2019-cu ilin müvafiq dövrü ilə müqayisədə 43,3 milyon kilovat/saat, idxalı isə 87,4 milyon kilovat/saat olmaqla, ötən ilin müvafiq dövrünə nisbətən 6,4 milyon kilovat/saat azalıb.
“Azərişıq”: Kəlbəcər Rəqəmsal İdarəetmə Mərkəzinin tikintisi davam edir
Macarıstan gələn il Türkiyədən qaz tədarükünə başlayacaq
Azərbaycanda elektrik enerjisi istehsalı artıb
Mingəçevirdə müstəqillik dövrünün ən böyük elektrik stansiyası tikilir
“Azərişıq” ASC Hacıqabulda yenidənqurma işlərini davam etdirir