Yeni növ koronavirusun mənşəyi ilə bağlı araşdırmalar davam etdirilir
Cenevrə, 4 avqust, AZƏRTAC
Ümumdünya Səhiyyə Təşkilatı (ÜST) koronavirusun mənşəyi və ilkin yayılma ərazisi barədə əsaslı araşdırmalara ehtiyac olduğunu deyib.
AZƏRTAC xəbər verir ki, ÜST-nin fövqəladə hallar proqramının icraçı direktoru Maykl Rayan bu barədə danışıb.
O bildirib ki, virusun Uxanda və ya başqa yerdə heyvandan insana keçməsini müəyyən etmək üçün müfəssəl tədqiqatlara ehtiyac var. Dünyada ilk dəfə Çinin bu şəhərində yeni növ ağciyər xəstəliyi ilə bağlı həyəcan siqnalı çalınmasına baxmayaraq, heç də o anlama gəlməməlidir ki, bu şəhər ilk yayılma baş verən məkandır.
M.Rayan qeyd edib ki, bu virusa yoluxan ilk şəxslər müəyyən edildiyi halda heyvan mənşəyini araşdırmaq mümkün ola bilər. O, bu prosesin özünü belə samanlıqda iynə axtarmağa bənzədib. Çinli həmkarları ilə birgə çalışan ÜST mütəxəssisləri müvafiq araşdırmaları aparıblar və bu araşdırmalar ÜST-nin rəhbərlik etdiyi beynəlxalq qrupun fəaliyyəti üçün əsas olacaq. Həmin qrup Çində virusun mənşəyi ilə bağlı bütün suallara aydınlıq gətirməli və araşdırmalar aparmalıdır.
Elgün Niftəli
AZƏRTAC-ın xüsusi müxbiri
Cenevrə
Kreml Fransanın mülkiyyət hüququnu pozmaqda ittiham edib
Ukrayna bu il silah-sursat alınmasına 4 milyard dollar xərcləyib
“SpaceX” daha 23 internet peykini orbitə çıxarıb
Almaniyada mənzil oğrularına qarşı ehtiyat tədbirləri açıqlanıb
Britaniyada 70 min nəfərə qarşı dələduzluq edən dəstə üzvləri həbs olunub