Bakı, 17 iyun, AZƏRTAC

Sənaye parkları ölkədə qeyri-neft sektorunun davamlı inkişaf etdirilməsində, ölkə iqtisadiyyatının ixrac qabiliyyətinin, eləcə də rəqabətqabiliyyətli, idxalı əvəz edən məhsulların istehsalının artırılmasında mühüm rol oynayır. Sənaye parklarının rezidentləri tərəfindən istehsal olunan məhsullar ölkədə daxili bazarın təlabatının ödənilməsi ilə yanaşı, “Made in Azerbaijan” brendi ilə bir çox ölkələrə ixrac edilir.
İqtisadiyyat Nazirliyinin mətbuat xidmətindən AZƏRTAC-a bildirilib ki, Sumqayıt Kimya Sənaye Parkının rezidentləri olan “SOCAR Polymer” MMC və “STDC” MMC İqtisadi İslahatların Təhlili və Kommunikasiya Mərkəzi tərəfindən hazırlanan “İxrac İcmalı” jurnalının bu ilin may ayı üzrə qeyri-dövlət ixracatçı subyektlərin reytinqində ilk onluğa daxil ediliblər. Reytinq cədvəlində “SOCAR Polymer” MMC birinci, “STDC” MMC isə beşinci yerdə qərarlaşıb.
Qeyd edək ki, bu ilin birinci rübü ərzində “SOCAR Polymer” MMC 53,7 milyon manat, “STDC” MMC isə 10,3 milyon manat dəyərində məhsul ixrac edib.