Bakı, 3 aprel, AZƏRTAC

İqtisadiyyat naziri Mikayıl Cabbarov Avropa Yenidənqurma və İnkişaf Bankının (EBRD) Şərqi Avropa və Qafqaz üzrə idarəedici direktoru Matteo Patrone, qurumun Qafqaz üzrə regional direktoru Katarina Bjorlin Hansen və Bankın Azərbaycan üzrə rəhbəri İvana Duarte ilə telefon danışıqları aparıb.
Nazirlikdən AZƏRTAC-a bildirilib ki, müzakirələr koronavirus (COVID-19) epidemiyasının təsirləri ilə mübarizə istiqamətində Azərbaycan hökumətinin və bankın səylərinin birləşdirilməsinə həsr olunub.
Qeyd edilib ki, EBRD Azərbaycandakı müştərilər də daxil olmaqla, 38 ölkəni əhatə edən tərəfdaş ölkələr üçün 1 milyard avro dəyərində təcili “həmrəylik paketi” təqdim edib. Bu baxımdan, bank Azərbaycanla əməkdaşlığı intensivləşdirmək niyyətindədir.
M.Cabbarov koronavirus pandemiyasının, habelə dünya enerji və fond bazarlarında yaranmış vəziyyətin Azərbaycan iqtisadiyyatına, makroiqtisadi sabitliyə, məşğulluğa və ölkədə fəaliyyət göstərən təsərrüfat subyektlərinə təsirini azaltmaq məqsədilə ölkə başçısı tərəfindən martın 19-da Fərman imzalandığını diqqətə çatdırıb. Bildirib ki, fərmana əsasən, koronavirus pandemiyasının mənfi təsirlərinin azaldılması tədbirlərinin maliyyələşdirilməsi üçün Nazirlər Kabinetinə dövlət büdcəsindən 1 milyard manat ayrılıb.
İqtisadiyyat naziri Azərbaycanın mövcud çağırışları qarşılamaq üçün kifayət qədər resurslara malik olduğunu, eyni zamanda, EBRD-nin təklif etdiyi dəstək tədbirlərinin də dəyərləndirildiyini diqqətə çatdırıb.
EBRD-nin Şərqi Avropa və Qafqaz üzrə idarəedici direktoru M.Patrone Azərbaycan hökuməti ilə mövcud sıx əməkdaşlığı yüksək qiymətləndirib və bundan sonra da Azərbaycan iqtisadiyyatını dəstəkləməyə, bu məqsədlə səyləri artırmağa hazır olduqlarını vurğulayıb. Qeyd edib ki, EBRD təcili dəstək proqramı çərçivəsində bank müştərilərinə likvidlik, dövriyyə kapitalı və ticarətin maliyyələşdirilməsi kimi tədbirlərlə dəstək verməyə hazırdır.
Məlumat üçün bildirək ki, EBRD bu günə qədər Azərbaycana 173 layihə üzrə 3,5 milyard avro maliyyə vəsaiti ayırıb. Bundan başqa, bank kiçik və orta biznesə məsləhət xidmətləri, 1000-dən çox şirkətə isə dəstək göstərir.