Bakı, 6 mart, AZƏRTAC

İkinci Beynəlxalq “Kibertəhlükəsizlik həftəsi” çərçivəsində Nəqliyyat, Rabitə və Yüksək Texnologiyalar Nazirliyinin İnformasiya-Kommunikasiya Texnologiyalarının Tətbiqi və Tədrisi Mərkəzinin (İKT LAB) təşkilatçılığı ilə kibertəhlükəsizlik üzrə beynəlxalq sertifikatlaşdırma seminarı keçirilib.
Nazirlikdən AZƏRTAC-a bildirilib ki, məqsəd kibertəhlükəsizlik üzrə mütəxəssislərin beynəlxalq sertifikatlaşdırma imkanları barədə iştirakçıları məlumatlandırmaqdır. “İKT LAB” Tətbiq və Tədris Mərkəzinin direktoru Rauf Cabarov mərkəz tərəfindən şəbəkə və IT mütəxəssisləri üçün peşəkar kibertəhlükəsizlik, “Cisco CCNA security” və digər istiqamətlərdə keçirilən təlimlər haqda məlumat verib. O, həmçinin “Azərbaycan Respublikasında 2020-2025-ci illər üçün informasiya təhlükəsizliyi və kibertəhlükəsizlik üzrə Milli Strategiya”nın qəbulunun əhəmiyyətini qeyd edərək müvafiq sənədin hazırlandığını diqqətə çatdırıb.
Kibertəhlükəsizlik mütəxəssisi, “İKT LAB”-ın təlimçisi Abdulla Abdullayev “Kill Chain” metodologiyası, kibertəhlükəsizlik üzrə sertifikatların kateqoriyaları və kibertəhlükəsizlik üzrə beynəlxalq sertifikatlar haqqında məlumat verib. “EC-Council” təşkilatının "Certified Ethical Hacker (C|EH)" sertifikatlaşdırılmış etik haker proqramı və sertifikatlaşdırma imkanlarından bəhs edib. Qeyd olunub ki, dünyada ən yüksək maaşı bulud texnologiyası üzrə sertifikata malik mütəxəssislər alır.
Şəbəkə və təhlükəsizlik mühəndisi Ramil Baxşıyev “CompTIA security+” proqramı və beynəlxalq sertifikatlaşdırma imkanlarından danışıb.
Azərbaycan Standartlaşdırma İnstitutunun Təlim-Tədris Mərkəzi və İdarəetmə Sistemlərinin və Personalın Sertifikatlaşdırma Orqanının direktoru Saday Əliyev “ISO/IEC 27001:2015 İnformasiya Təhlükəsizliyi. Təhlükəsizlik metodları. İnformasiya təhlükəsizliyinin idarə edilməsi sistemləri. Tələblər” standartı əsasında beynəlxalq sertifikat haqda təqdimatla çıxış edib.
Kibertəhlükəsizlik üzrə beynəlxalq sertifikatlaşdırma seminarının davamı olaraq martın 10-14-də “ISO/IEC 27001:2015 standartı – “İnformasiya təhlükəsizliyinin idarə edilməsi sisteminə olan tələblər” əsasında beynəlxalq sertifikatlaşdırma təlimi və martın 10-dan başlayaraq 2 ay müddətində davam edəcək “CompTIA Security+”, yəni “IT təhlükəsizliyinin əsasları” beynəlxalq sertifikatlaşdırma təlimi təşkil ediləcək. İştirakçılar təlimə qatılmaqla yanaşı, imtahanları uğurla keçərək beynəlxalq sertifikat almaq imkanı əldə edəcəklər.
Qeyd edək ki, “Kibertəhlükəsizlik həftəsi” sahə üzrə əlaqəli fəaliyyətin səmərəliliyinin artırılması və maarifləndirmə səviyyəsinin yüksəldilməsi məqsədilə Nəqliyyat, Rabitə və Yüksək Texnologiyalar Nazirliyi tərəfindən ikinci ildir keçirilir.