Maykl Blumberq sosial müavinətlərin artırılması üzrə plan təqdim edib
Vaşinqton, 19 fevral, AZƏRTAC
Nyu-Yorkun sabiq meri və ABŞ-da prezident seçkilərində Demokratlar Partiyasından namizədliyə iddiaçılardan biri Maykl Blumberq özünün sosial təminat planını açıqlayıb. O, sosial təminat proqramını gücləndirəcəyini və müavinət alan ən yoxsul adamlara imtiyazlar əlavə edəcəyini bildirib.
AZƏRTAC xəbər verir ki, Blumberqin planına sosial təminat üzrə yeni minimal müavinətin tətbiqi, hökumət tərəfindən maliyyələşdirilən təqaüd yığımları planının yaradılması, ahıllar üçün “Medicare” milli tibbi sığorta proqramı çərçivəsində dərmanlara sərf olunan xərclərin məhdudlaşdırılması, gündəlik sığorta təminatının genişləndirilməsi və böyük xərclərdən müdafiə olunmaq üçün federal təhlükəsizlik sisteminin işlənib hazırlanması daxildir.
“Onilliklər ərzində işləyən amerikalılar təqaüdə çıxmaq imkanına layiqdirlər. Bununla yanaşı, onlar daimi maliyyə ehtiyacı ilə qarşılaşmamalıdırlar. Mən Prezident qismində sosial təminat sistemini gücləndirəcəyəm”, - deyə Blumberqin bəyanatında bildirilir.
ABŞ-ın Sosial Təminat Administrasiyasının məlumatına görə, Birləşmiş Ştatlarda hər bir orta təqaüdçü pensiya şəklində bu proqram üzrə ayda 1503 dollar alır.
AZƏRTAC-ın Vaşinqton bürosu
Zaxarova: ABŞ-ın Ukrayna, İsrail və Tayvana yardımı böhranı daha da dərinləşdirəcək
Bayden: Ukraynaya yardım döyüş meydanında təcili ehtiyacların ödənilməsi üçün zəruridir
ABŞ Konqresi Ukraynaya 61 milyard dollarlıq yardıma dair qanun layihəsini qəbul edib
Yaponiyada 2 hərbi helikopterlə əlaqə kəsilib
Zelenski: Ukrayna ABŞ-la təhlükəsizlik zəmanəti üzrə razılaşmaya yaxınlaşır