Azərbaycan Dövlət
İnformasiya Agentliyi

A
A
A
Sazlamalar

Hüquq və İnsan Haqları İnstitutunun doktorantura və dissertanturasına 24 nəfər sənəd verib

Bakı, 24 yanvar, AZƏRTAC

Azərbaycan Milli Elmlər Akademiyasının (AMEA) Hüquq və İnsan Haqları İnstitutunun doktorantura və dissertanturasına sənəd qəbulu başa çatıb.
İnstitutdan AZƏRTAC-a bildirib ki, fəlsəfə doktoru hazırlığı proqramı üzrə doktoranturaya 8 və dissertanturaya 7 nəfər, elmlər doktoru hazırlığı proqramı üzrə dissertanturaya 9 nəfər sənəd verib.
Xatırladaq ki, fəlsəfə doktoru proqramı üzrə doktoranturaya qəbul olmaq istəyən şəxslər xarici dildən ali təhsil pilləsinin magistratura səviyyəsi üçün qüvvədə olan tədris proqramları həcmində (rus dili istisna olmaqla, seçim sərbəst və ya ixtisasa uyğun olmalıdır) Dövlət İmtahan Mərkəzində imtahan verəcəklər. Xarici dildən imtahanda keçid balını toplayan şəxslər fəlsəfədən imtahana buraxılırlar. Fəlsəfədən məqbul alan şəxslər ixtisas imtahanına buraxılırlar.
Dissertantlıq yolu ilə fəlsəfə doktoru elmi dərəcəsi almaq istəyən şəxslər ilk dəfə olaraq bu il xarici dildən ali təhsil pilləsinin magistratura səviyyəsi üçün qüvvədə olan tədris proqramları həcmində (rus dili istisna olmaqla, seçim sərbəst və ya ixtisasa uyğun olmalıdır) Dövlət İmtahan Mərkəzində imtahan verməlidirlər. İmtahandan uğurla keçənlər müsabiqəyə buraxılacaqlar.
Doktorantura və dissertanturaya qəbul olmaq istəyən namizədlər üçün xarici dil imtahanı yanvarın 26-da keçiriləcək.

Elm və təhsil 2020-01-24 13:00:00