Tbilisi, 20 yanvar, AZƏRTAC

Gürcüstan Azərbaycanlıları Konqresi (GAK) 20 Yanvar faciəsi ilə əlaqədar anım tədbiri keçirib.
AZƏRTAC xəbər verir ki, konqresin sədri Hüseyn Yusubov, təşkilatın üzvləri, Marneuli və Bolnisi rayonunun ziyalıları, yerli bələdiyyələrin deputatları, məktəblilər yanvarın 19-da Qanlı Yanvar şəhidi İlqar Əhmədovun Bolnisi rayonunun Faxralı kəndində məzarını ziyarət ediblər.
Şəhidlərin xatirəsi bir dəqiqəlik sükutla yad olunub, onların ruhuna dualar oxunub.
GAK sədri H.Yusubov 20 Yanvar faciəsi ilə bağlı məlumat verib, şəhidlərin öz qanları ilə Azərbaycan tarixində qəhrəmanlıq səhifəsi açdıqlarını bildirib.
Digər çıxış edənlər Azərbaycan və gürcü xalqlarının müstəqillik uğurundakı mübarizəsindən danışıb, hər iki ölkənin şəhidlərinin xatirəsinin daim əziz tutulduğunu bildiriblər.
Mərasimdə Faxralı kənd məktəblərinin şagirdləri şəhidlərə həsr olunmuş şeirlər söyləyiblər.

Xətayi Əzizov
AZƏRTAC-ın xüsusi müxbiri
Tbilisi