×
A
A
A
Sazlamalar

Muğanlı-İsmayıllı avtomobil yolu ilə bağlı ilkin layihə planının variantları işlənilir

Bakı, 22 noyabr, AZƏRTAC 

Muğanlı-İsmayıllı avtomobil yolunun yenidən qurulması və ya yeni magistralın müəyyənləşdirilməsi məqsədilə ilkin layihə planının hazırlanması istiqamətində Azərbaycan Avtomobil Yolları Dövlət Agentliyi (AAYDA) tərəfindən bir sıra işlər görülür.
AAYDA–nın İctimaiyyətlə əlaqələr şöbəsindən AZƏRTAC-a bildirilib ki, bu işlər çərçivəsində yerli layihəçilərlə birgə ilkin layihə variantlarının hazırlanması, mükəmməl layihə planlaşdırılmasının həyata keçirilməsi üçün analoji ərazilərdə yol, körpü, tunel, mühəndis qurğuların layihələndirilməsi təcrübəsinə malik olan Avstriyanın “Ste.p ZT GmbH” mühəndislik bürosunun nümayəndələri ilə agentlikdə işgüzar görüş keçirilərək müzakirələr aparılıb.
Nəticədə mövcud Muğanlı-İsmayıllı avtomobil yolunun yenidən qurulması və ya yeni magistralın müəyyənləşdirilməsi məqsədilə ilkin layihə planının variantlarının işlənməsi ilə bağlı geoloji və geotexniki tədqiqatların (yolun keçəcəyi güzərgahın müəyyənləşdirilməsi, ərazinin geoloji şəraitinin və dinamikasının öyrənilməsi üçün sondaj quyularının qazılması və sair) aparılmasına qərar verilib.
Muğanlı-İsmayıllı avtomobil yolu paytaxtımızı İsmayıllı, Qəbələ, Oğuz, Şəki, Qax, Zaqatala və Balakən rayonları ilə birləşdirən ən qısa yoldur. Mürəkkəb relyef şəraitində tektonik hərəkətlərin baş verdiyi 9 ballıq aktiv seysmik zonada yerləşən, atmosfer sularının təsirindən sürüşməyə meyilli dağ yamaclarından keçən yolda vaxtaşırı torpaq sürüşmələri baş verir.
Uzunluğu 40 kilometr olan bu yolu sürüşmələrdən qorumaq üçün hər il təmir-tikinti işləri aparılmasına, yol uçqunlarının təmizlənməsi və həmin hissələrin yenidən bərpası, qabion divarlarının inşası və sair tədbirlərə baxmayaraq, avtomobil yolu demək olar ki, öz fəaliyyətini qısa və ya uzun müddətli fasilələrlə dayandırmalı olur.
“Ste.p ZT GmbH” mühəndislik bürosu Avstriyanın ən məşhur və ən böyük tikinti-mühəndislik şirkətlərindən biridir. Mülki mühəndislik və bina tikintisi, tunel, nəqliyyat infrastrukturu və planlanması, yol mühəndisliyi, geologiya və geotexnika mühəndisliyi, istismar və təhlükəsizlik texnologiyası və sair kimi mühəndisliyin bütün sahələri üzrə ən yüksək səviyyədə xidmətlər təklif edir. Şirkət 70 illik təcrübəyə əsaslanmaqla hər hansı bir layihənin reallaşdırılması üçün tələb olunan bütün layihə-planlaşdırma xidmətlərinin həyata keçirilməsi üçün geniş imkanlara malikdir. Şirkətin əməkdaşları tərəfindən müştəri ilə birlikdə spesifikasiyalara və dizayn ideyalarına əsasən texnologiya, xərc və vaxt baxımından optimallaşdırılmış tikinti layihəsi fərdi olaraq hazırlanır, həmçinin ilkin layihələrin hazırlanması və ya planlaşdırılması, tender üçün layihə cizgilərinin və layihə sənədlərinin tərtib olunması, işçi cizgilərin hazırlanması, optimal variantın seçilməsi və sair mühəndislik xidmətləri göstərilir.

Regionlar 2019-11-22 13:46:00