Bakı, 17 oktyabr, AZƏRTAC
Beynəlxalq Olimpiya Komitəsi (BOK) 2020-ci il Yay Olimpiya Oyunlarında keçiriləcək idman yürüşü və marafon yarışlarının Tokioda deyil, Sapporoda keçiriləcəyini təsdiq edib. Bu barədə məlumatı Kyodo agentliyi yayıb.
AZƏRTAC xəbər verir ki, qadın marafonu avqustun 2-də, kişilərin yarışı isə avqustun 9-da keçiriləcək. Kişilərin 20 kilometrə yürüşü iyulun 31-də, qadınların isə avqustun 7-də olacaq. 50 kilometr məsafəyə kişilərin yürüşünün avqustun 8-də keçiriləcəyi bildirilir. Qeyd olunur ki, yüngül atletika üzrə yarışlar (5000 metr və daha uzaq məsafəyə) axşam sessiyalarında təşkil ediləcək. Reqbi üzrə matçlar saat 12:00-dan gec başa çatmamalıdır, velosiped yürüşlərinin dağ mərhələləri isə saat 15:00-dan tez başlaya bilməz.
Qeyd olunub ki, bu tədbirlər atletlərin isti havalardan qorunması məqsədilə görülüb. BOK planlaşdırılan dəyişikliklər barədə artıq Beynəlxalq Yüngül Atletika Assosiasiyaları Federasiyasına məlumat verib. Federasiyanın prezidenti Sebastyan Kou bu təşəbbüsü dəstəkləyib.
Bundan əvvəl BOK bəyan etmişdi ki, idman yürüşü və marafon yarışlarının temperaturun aşağı səviyyədə -avqustda müsbət 21 dərəcə olduğu Sapporoya keçirilməsi idmançıların sağlamlığını qorumaqla bağlıdır. Həmin günlərdə Tokioda havanın hərarəti 27 dərəcədən çox olur.
Bu il Dohada keçirilmiş dünya çempionatının gedişində turnirin təşkilatçıları marafon və idman yürüşü yarışlarının ekstremal şəraitdə keçirilməsindən şikayət etmişdilər. Həmin günlərdə Qətərin paytaxtında havanın hərarəti 30 dərəcədən artıq olub və yüksək səviyyədə rütubətlə müşahidə edilib. Boğucu hava səbəbindən qadın marafonu iştirakçılarının yarısı finişə çata bilməyib, bəziləri isə huşunu itirdiyindən, onlara tibbi yardım göstərilib.