Bakı, 16 oktyabr, AZƏRTAC

Peşə təhsili müəssisələrində çalışan pedaqoji heyətin Türkiyənin İstanbul, Ankara və İzmir şəhərlərində müvafiq istiqamət üzrə təlimlərə cəlb olunması nəzərdə tutulur. Peşə Təhsili üzrə Dövlət Agentliyindən AZƏRTAC-a bildirilib ki, 2019-2020-ci tədris ili ərzində Azərbaycan və Türkiyə arasında peşə təhsili sahəsində əməkdaşlıq çərçivəsində ölkəmizin peşə təhsili müəssisələrində çalışan 49 nəfər mühəndis-pedaqoji heyət İstanbul, Ankara və İzmir şəhərlərində fəaliyyət göstərən müvafiq məktəblərdə təlimlərə cəlb olunacaq.
Təlimlərin 2-12 həftə müddətində, liderlik, turizm, inşaat, dərzi, dizayn, incəsənət, avtomobil, kənd təsərrüfatı, elektrik, zərgərlik istiqamətləri üzrə həyata keçirilməsi planlaşdırılıb.
Sözügedən əməkdaşlıq çərçivəsində İstanbulda inşaat sahəsi üzrə 1 aylıq təlim prosesinə artıq başlanılıb. Təlim zamanı peşə təhsili müəssisələrindən seçilən 4 müəllim təməl inşaat texnologiyası, xarrat-dülgər, çilingərlik, santexnika istiqamətləri üzrə təlimlər çərçivəsində təhsil müəssisələrinin emalatxanaları və avadanlıqların iş prinsipi ilə yaxından tanış olublar.