Bakı, 11 oktyabr, AZƏRTAC

Əmək və Əhalinin Sosial Müdafiəsi Nazirliyində Beynəlxalq Maliyyə Korporasiyasının (IFC) Azərbaycanda İnvestisiya Mühiti və Aqrobiznes Rəqabətliliyi layihəsinin yeni rəhbəri Yekaterina Avaliani ilə görüş olub.
Nazirliyin İctimaiyyətlə əlaqələr və kommunikasiya şöbəsindən AZƏRTAC-a verilən məlumata görə, görüşdə Əmək və Əhalinin Sosial Müdafiəsi nazirinin müavini Mətin Kərimli Y.Avalianini yeni təyinatı münasibətilə təbrik edib və ona gələcək fəaliyyətində uğurlar arzulayıb. Nazir müavini Prezident İlham Əliyevin sosial islahatlar proqramı barədə məlumat verib. Aparılan islahatların bir istiqamətinin də əmək müfəttişliyi sisteminin mütərəqqi təcrübələr əsasında təkmilləşməsinə yönəldiyini vurğulayıb.
M.Kərimli IFC-nin “Azərbaycan İnvestisiya Mühiti və Aqrobiznes Rəqabətliliyi Layihəsi” çərçivəsində ötən dövrdə aparılmış işlərin, o cümlədən ekspert missiyalarının Azərbaycana səfərlərinin əhəmiyyətindən bəhs edərək bildirib ki, layihə, eyni zamanda, əmək müfəttişlərinin peşə bacarıqlarının artırılmasına, əmək qanunvericiliyinə əməl olunmasına nəzarət sahəsində qabaqcıl təcrübələrə əsaslanan risk əsaslı nəzarət modelinin hazırlanmasına, əmək müfəttişliyi sisteminin institusional potensialının artırılması ilə bağlı digər məsələlərdə əhəmiyyətli dəstəkdir.
Nazir müavini yeni təyin olunan layihə rəhbərinin iştirakı ilə bu istiqamətdə müzakirələrin, işçi qrupları formatında görüşlərin davam edəcəyini deyib. Nazir müavini yeni yaradılan Əməyin Mühafizəsi Fondu barədə də layihə rəhbərinə məlumat verib.
Y.Avaliani əmək, məşğulluq və sosial müdafiə sahələrində ölkəmizdə aparılan islahatları maraqla izlədiyini deyib. O, yeni rəhbəri təyin olunduğu layihənin ölkəmizin əmək müfəttişliyi sistemində islahatlara dəstək missiyasının, ümumən qarşılıqlı fəaliyyətin bundan sonra da yüksələn templə davam edəcəyini bildirib.
Görüşdə layihə çərçivəsində görülən işlərə və birgə iş müstəvisində qarşıda duran vəzifələrə dair fikir mübadiləsi aparılıb.