Azərbaycan Dövlət
İnformasiya Agentliyi

A
A
A
Sazlamalar

Qış yataqları və diri heyvan satışı yerlərində dezinfeksiya tədbirləri aparılır

Bakı, 9 oktyabr, AZƏRTAC

May ayında yaylaqlara aparılan heyvanlar havaların soyuması ilə əlaqədar dağlıq ərazilərdən qış yataqlarına qaytarılır. Sürülər yol gələnə kimi heyvanların qışı keçirəcəyi tövlələr, yataqlar sahibkarlar tərəfindən mexaniki təmizlənir, baytar həkimlərinin tövsiyə və iştirakı ilə həmin yerlərdə dezinfeksiya, dezinseksiya və deratizasiya tədbirləri aparılır. Eləcə də qış yataqlarına qayıdan heyvanlar dehelmintizasiya (qurdlara qarşı aparılan tədbir) edilərək kliniki baytarlıq baxışından keçirilir.
Kənd Təsərrüfatı Nazirliyinin İctimaiyyətlə əlaqələr və informasiya təminatı şöbəsindən AZƏRTAC-a bildiriblər ki, belə tədbirlərdən biri nazirlik yanında Aqrar Xidmətlər Agentliyinin Göyçay Rayon Baytarlıq İdarəsinin baytar mütəxəssisləri tərəfindən rayonun Qarabaqqal kəndi ərazisində Oğuz rayonunun “Bədəl” yaylağından qayıtmış 1500 başa qədər xırdabuynuzlu heyvan saxlayan Orxan Hacıyevə, 300 başa qədər xırdabuynuzlu heyvan saxlayan Elxan Həmidova, eləcə də “Babadağ” yaylağından qayıtmış 250 başa qədər heyvan saxlayan Yafəz İbrahimova məxsus təsərrüfatlarda həyata keçirilib. Qışlaq yataqlarına yenicə qayıtmış heyvanlarda dehelmitizasiya tədbiri aparılıb, heyvanlara baytar klinik baxış keçirilib və heyvan saxlanan ağıllarda, yataqlarda dezinfeksiya işləri görülüb.
Mütəxəssislər Qarabaqqal kəndi ərazisində yerləşən mal-qara satışı bazarında da mexaniki təmizlik işləri aparıb və ərazidə profilaktik dezinfeksiya, dezinseksiya və deratizasiya işləri görüblər. Profilaktik dezinfeksiya, dezinseksiya və deratizasiya tədbirləri 3500 kvadratmetr ərazini əhatə edib. Dezinfeksiya məhlulları əraziyə DUK maşınları vasitəsi ilə güclü axın şəkilində səpilib. Tədbirlər çərçivəsində heyvanların saxlanması, bəslənməsi və xəstəliklər barədə sahibkarlara məlumat verilib, sanitar maariflənmə işi yerinə yetirilib.
Bundan başqa, Aqrar Xidmətlər Agentliyinin Kürdəmir Rayon Baytarlıq İdarəsinin baytar mütəxəssisləri tərəfindən Kürdəmir rayonunun Yeni Şıxımlı qəsəbə sakini Babək Məmmədova məxsus təsərrüfatda saxlanılan 250 baş xırdabuynuzlu heyvan ektoparazitlərə görə 0.005 faizli kreolin məhlulu ilə işlənib, 400 m2 tövlə və tövləətrafı ərazilər sahibkar tərəfindən mexaniki təmizləndikdən sonra 1 faizli almerdehyde məhlulu ilə dezinfeksiya olunub. Dezinfeksiya məhlulları əraziyə DUK maşınları və avtomatik çiləyicilərlə güclü axın şəkilində səpilib. Aparılan tədbirlər çərçivəsində heyvanların saxlanması, bəslənməsi və xəstəliklər barədə sahibkarlara məlumat verilib, sanitar maarif işi yerinə yetirilib. Eləcə də qışlaq yataqlarına yenicə qayıtmış heyvanlarda dehelmitizasiya tədbiri aparılıb, heyvanlar klinik baxışdan keçirilib.
Kənd Təsərrüfatı Nazirliyi yanında Aqrar Xidmətlər Agentliyi bildirir ki, bu tədbirlər yaylaqdan dönən heyvanların müxtəlif iti yoluxucu və invazion xəstəliklərdən qorunması məqsədi ilə aparılır və sürünün sağlamlığına xidmət edir. Məhz bu səbəbdən heyvan sahibləri qışlaq ərazilərdə və heyvanların qışı keçirəcəkləri tövlələrdə mexaniki təmizlik, dezinfeksiya, dezinseksiya və deratizasiya tədbirləri aparılmasına xüsusi diqqət göstərməlidirlər.
Dezinfeksiya, dezinseksiya və deratizasiya işlərinin bundan sonra da davam etdirilməsi nəzərdə tutulub. Hazırda ölkə ərazisində epizootik durum sabitdir və lazımi təşkilati-təsərrüfat tədbirləri davam etdirilir.

Kənd təsərrüfatı 2019-10-09 11:01:00