×
A
A
A
Sazlamalar

Komitə sədrinin müavini: Azərbaycanda dinin siyasiləşdirilməsi cəhdlərinin heç bir perspektivi yoxdur

Bakı, 25 sentyabr, AZƏRTAC 

Dini Qurumlarla İş üzrə Dövlət Komitəsi (DQİDK) və Beyləqan Rayon İcra Hakimiyyətinin birgə təşkilatçılığı ilə keçirilən “Müasir çağırışlar: dini durum və vəzifələr” mövzusunda regional konfrans sentyabrın 25-də “Dini radikalizmlə mübarizə və maarifləndirmə” adlı panel iclasla öz işini davam etdirib.
DQİDK-dan AZƏRTAC-a verilən məlumata görə, orta məktəblərin direktorları və direktorların təlim-tərbiyə işləri üzrə müavinləri, məktəb psixoloqları, “Həyat bilgisi” fənnini tədris edən müəllimlər, ziyalılar və ictimaiyyətin digər nümayəndələrinin iştirak etdiyi tədbiri giriş sözü ilə açan Beyləqan Rayon İcra Hakimiyyəti başçısının müavini Yeganə Məmmədova mövzunun əhəmiyyətindən danışıb. O, həmçinin rayondakı dini durum, eləcə də dini icmaların fəaliyyəti barədə ətraflı məlumat verib.
Dini Qurumlarla İş üzrə Dövlət Komitəsinin sədr müavini Gündüz İsmayılov radikal dini qrupların və qeyri-ənənəvi təriqətlərin zərərli təbliğatının qarşısının alınması, onlara qarşı effektiv mübarizə aparılması, dini maarifləndirmə işinin düzgün metodlarla təşkili məsələlərindən danışıb. Onun sözlərinə görə, dini radikalizmlə mübarizənin gücləndirilməsi və milli-mənəvi dəyərlərin qorunub saxlanılması məqsədilə dini maarifləndirmə işinin aparılması zəruridir.
Dinin siyasiləşdirilməsi və məzhəbçilik kimi məsələlərə də toxunan sədr müavini qeyd edib ki, bu məsələlər dini radikalizm və xurafatdan heç də az təhlükə daşımır. Respublikamızda da dinin siyasiləşdirilməsinə və məzhəbçiliyin təbliğinə cəhdlər var, amma bu cəhdlərin perspektivi görünmür. O vurğulayıb ki, Azərbaycan xalqının yüksək mədəniyyəti, milli-mənəvi dəyərlərə bağlılığı, dünyagörüşü və dövlətin apardığı siyasət buna imkan verə bilməz. İslam dininin bütün məzhəblərin fövqündə dayandığını vurğulayan Gündüz İsmayılovun sözlərinə görə, məzhəb təəssübkeşliyi din təəssübkeşliyindən üstün olmamalıdır.
Dinimizin xurafata, cahilliyə və radikalizmə qarşı olduğunu diqqətə çatdıran DQİDK-nın sədr müavini deyib ki, bu kimi mənfi halların baş verməsinə səbəb dini bilgilərin yetərincə olmamasıdır. Gündüz İsmayılov onu da bildirib ki, Dini Qurumlarla İş üzrə Dövlət Komitəsi digər müvafiq qurumlarla birgə dini radikalizm və xurafata qarşı həm inzibati, həm də maarifçilik istiqamətində tədbirlər həyata keçirir.
Tədbirdə çıxış edən Beyləqan Rayon Təhsil şöbəsinin müdiri Tahir Həsənov dini radikalizm və ekstremizmə qarşı maarifləndirmə metodunun effektivliyini xüsusi vurğulayaraq gənclərin düzgün dini bilgilərə yiyələnmələrinin vacibliyini iştirakçıların diqqətinə çatdırıb.
İkigünlük regional konfrans iştirakçıları maraqlandıran sualların cavablandırılması ilə yekunlaşıb.

 

Din 2019-09-25 16:17:00