Azərbaycan Dövlət
İnformasiya Agentliyi

A
A
A
Sazlamalar

“Gənclərin Məşğulluğu” proqramına müraciət edən şəxslərin işlə təmin olunmasına başlanılıb

Bakı, 21 sentyabr, AZƏRTAC

Əmək və Əhalinin Sosial Müdafiəsi Nazirliyi yanında Dövlət Məşğulluq Xidməti və Azərbaycan Respublikası Gənclər Fondunun birgə layihəsi olan “Gənclərin Məşğulluğu” proqramına müraciət edən şəxslərin işlə təmin olunmasına başlanılıb. Aprel ayından start verilən proqrama ilkin mərhələdə 614 nəfər gənc cəlb edilib.
Nazirliyin İctimaiyyətlə əlaqələr və kommunikasiya şöbəsindən AZƏRTAC-a verilən məlumata görə, layihə çərçivəsində ali və orta-ixtisas təhsili müəssisələrinin 29 yaşına qədər olan məzunları işə cəlb olunur və müəyyən müddət ərzində onların əməkhaqlarının bir qismi fond tərəfindən maliyyələşdirilir.
Proqramın icrası zamanı sosial cəhətdən həssas kateqoriyalardan (əlilliyi olan şəxslər, şəhid ailəsinin üzvləri, məcburi köçkünlər və s.) olanlar, regionlarda yaşayanlar, iş təcrübəsi olmayanlara üstünlük verilir. Namizədlərin seçimi işəgötürənlər tərəfindən aparılır. Layihənin icrası prosesi ilboyu davam edəcək, vakansiyalar mütəmadi olaraq yenilənəcək.
Məqsəd gənclərin uğurlu karyera planlaşdırmasına (ixtisas üzrə iş tapmaq), əlavə iş (xüsusilə də regionlarda) yerlərinin yaradılmasına, iş üçün müraciət edən gəncin ilk iş təcrübəsi qazanmasına və əmək bazarında rəqabətin artırılmasına dəstək verməkdir.

Sosial 2019-09-21 12:27:00