Birləşmiş Ərəb Əmirliklərində keçirilən “SMART SME MENA 2019” sərgisi başa çatıb
Sərgidə Azərbaycan mütəxəssisləri tərəfindən hazırlanan məhsullara böyük maraq olub
Bakı, 20 sentyabr, AZƏRTAC
Bir çox ölkənin qatıldığı “SMART SME MENA 2019” sərgisi başa çatıb. Azərbaycan da bu sərgidə rəqəmsal həllərini ziyarətçilərə təqdim edib. Ölkəmizi “SMART SME MENA 2019” sərgisində Nəqliyyat, Rabitə və Yüksək Texnologiyalar Nazirliyinin Məlumat Hesablama Mərkəzi yerli mütəxəssislər tərəfindən hazırlanan bir çox məhsullarla təmsil edib.
Birləşmiş Ərəb Əmirliklərində keçirilən sərgidə Nömrə daşıma, Çağrı mərkəzi xidməti, Mobil Cihazların Qeydiyyat Sistemi, Elektron arxiv, Elektron sənəd dövriyyəsi, Müqavilələrin qeydiyyatı kimi məhsullarımız nümayiş olunub.
Məlumat Hesablama Mərkəzinin direktoru Elnar Əsədov sərgidə iştirakla bağlı AZƏRTAC-a açıqlama verib.
“Bu sistemlərin hər biri yerli mütəxəssislər tərəfindən hazırlanıb. Azərbaycan mütəxəssisləri tərəfindən hazırlanan proqram təminatları, bu cür sistemlər təhlükəsizliyi və həm də dayanıqlılığı tam təmin edir. Yerli mütəxəssislər tərəfindən hazırlanan bu cür məhsulların öncə ölkə daxilində istifadəsi xarici bazarlarda satışına da böyük təkan verəcək. Sərgidə, eyni zamanda, bu məhsullardan başqa, elektron imza sahəsində innovativ həllər də ziyarətçilərə təqdim edilib. Bir çox ölkələr bu istiqamətdə artıq maraq göstərib. Ümumiyyətlə, sərgidə Azərbaycan mütəxəssisləri tərəfindən hazırlanan məhsullara böyük maraq var idi”, - deyə o bildirib.
Qeyd edək ki, “SMART SME MENA 2019” sərgisində iştirak edən şirkətlərin əsas hədəfi inkişaf etməkdə olan ölkələr, ələlxüsus, Şimali Afrika və Orta Şərq regionudur. Yerli məhsullarımızı xarici bazara çıxarmaq baxımından “SMART SME MENA 2019” sərgisində təmsil olunmaq ölkəmiz üçün xüsusi əhəmiyyət daşıyırdı. Belə sərgilərdə iştirak, məhz yerli mütəxəssislərimiz tərəfindən hazırlanan məhsulların Azərbaycan brendi olaraq xarici bazarlara çıxarılması, həmçinin xarici valyutanın Azərbaycana cəlb olunması baxımından önəmlidir.
“Azərkosmos” gələn il fevralda keçiriləcək “Beynəlxalq Kosmik Konvensiya 2024”də iştirak edəcək
Ölkənin informasiya təhlükəsizliyi və kibertəhlükəsizliyə dair Strategiyası təsdiq olunub - SƏRƏNCAM
Azərbaycan “Digitalisation and Channel Awards 2023” mükafatlandırılma mərasimində təmsil olunacaq
“Google” şirkətinin Bakı konfransına 1000-dən çox müraciət qeydə alınıb