Bakı, 13 sentyabr, AZƏRTAC 

Yeni dərs ilinin başlaması ilə əlaqədar Mingəçevir Şəhər Polis Şöbəsinin Dövlət Yol Polisi Bölməsinin və Baş Dövlət Yol Polisi İdarəsinin “Siqnal” İdarəsinin əməkdaşları rayon ərazisində baş verə biləcək yol-nəqliyyat hadisələrinin qarşısının alınması və məktəblilərin təhlükəsizliyinin təmin olunması məqsədilə müvafiq tədbirlər həyata keçiriblər.
Daxili İşlər Nazirliyinin mətbuat xidmətinin Şəki regional qrupundan AZƏRTAC-a bildiriblər ki, bu istiqamətdə görülən tədbirlər çərçivəsində Mingəçevir Şəhər Polis Şöbəsinin Dövlət Yol Polisi Bölməsinin və Baş Dövlət Yol Polisi İdarəsinin “Siqnal” İdarəsinin əməkdaşları tərəfindən şəhər ərazisində 8 istiqamətdə köhnə piyada keçidi nişanları müasir işıqlandırma imkanlarına malik günəş panelli nişanlarla əvəzlənib, 35-dən artıq piyada keçidi rənglənib.
Nəqliyyatın sıx olduğu təhsil müəssisələrinin yaxınlığında isə yeni zolaqlar salınıb.