Azərbaycan Dövlət
İnformasiya Agentliyi

A
A
A
Sazlamalar

Azərbaycan Avropa üçün tranzit hava axınlarının əlaqələndirici qovşağına çevrilib

Bakı, 6 sentyabr, AZƏRTAC

Brüsseldə Hava Naviqasiyasının Təhlükəsizliyi üzrə Avropa Təşkilatı (“Eurocontrol”) və Mülki Aviasiya Aeronaviqasiya Xidmətlərinin Təchizatçıları Təşkilatının (CANSO) üzvləri arasında görüş keçirilib. Tədbirdə Azərbaycanı “Azəraeronaviqasiya” Hava Hərəkəti İdarəsinin (AZANS) direktoru Fərhan Quliyev təmsil edib.
“Azərbaycan Hava Yolları” QSC-nin mətbuat xidmətindən AZƏRTAC-a bildirilib ki, işgüzar səfər çərçivəsində Fərhan Quliyev, həmçinin “Eurocontrol”un baş direktoru İmon Brennan (Eamonn Brennan) ilə görüşüb. Görüş zamanı hava hərəkətinin təşkili və Azərbaycan ərazisindən keçən tranzit hava axınlarının planlaşdırılması sahəsində əsas məsələlər, həmçinin ölkəmizin “Eurocontrol”un strateji tərəfdaşı kimi rolu müzakirə olunub.
Həmçinin regionda gözlənilməz hallar baş verdiyi təqdirdə hava hərəkətinin və zəruri tədbirlərin planlaşdırılması məsələləri müzakirə edilib.
İmon Brennan Azərbaycanın mülki aviasiya sahəsində əldə edilmiş nailiyyətlərini yüksək qiymətləndirib və qeyd edib ki, strateji coğrafi mövqeyi və qabaqcıl hava naviqasiyası sistemi Azərbaycanı əməkdaşlıq üçün cəlbedici edir, Avropa ilə Asiya arasında tranzit reyslərin sayının artmasına səbəb olur. Həmçinin o qeyd edib ki, Azərbaycan Avropa ilə Asiya arasındakı hava axınlarının əsas dəhlizidir.
Danışıqlar nəticəsində Heydər Əliyev Beynəlxalq Aeroportunda yerləşən “ASEC” mərkəzinin hava hərəkətində gözlənilməz hallar baş verdiyi təqdirdə uçuşların planlaşdırılması və proqnozlaşdırılmasında qarşılıqlı əməkdaşlıq üçün istifadəsinə dair Saziş imzalanıb. Sənədi AZANS-ın direktoru Fərhan Quliyev və Avropa regionunun hava məkanının idarə edilməsi mərkəzinin direktoru Yakopo Prissionotti (Iacopo Prissinotti) imzalayıblar.
Beləliklə, Azərbaycan “Eurocontrol”un yüksək etimadını qazanmaq ilə yanaşı, tranzit uçuşların planlaşdırılmasında tərəfdaş və böhran zamanı Dəstək mərkəzi kimi tanınıb.
Qeyd edək ki, AZANS “Azərbaycan Hava Yolları”nın hava hərəkətinin idarəsi üzrə struktur bölməsi olub, başlıca vəzifələrinə Azərbaycan Respublikasının hava məkanında uçuşların təhlükəsizliyinin təmin edilməsi, həmçinin ölkə ərazisi üzərində hərəkətin əlaqələndirilməsi və xidməti funksiyası daxildir.
“Eurocontrol” əsası 1960-cı ildə qoyulmuş Hava Naviqasiyasının Təhlükəsizliyi üzrə Avropa Təşkilatı olub, əsas məqsədi ümumi Avropa hava nəqliyyatı idarəetmə sisteminin işlənib hazırlanmasıdır. Təşkilat vahid Avropa hava nəqliyyatının idarəetmə sistemini yaratmaq niyyətindədir. “Eurocontrol” 41 üzv dövlətdən ibarətdir.

Nəqliyyat 2019-09-06 17:07:00