Azərbaycan Moskva Beynəlxalq Kitab Sərgi-Yarmarkasında təmsil olunur
Bakı, 5 sentyabr, AZƏRTAC
Sentyabrın 4-də 32-ci Moskva Beynəlxalq Kitab Sərgi-Yarmarkası işə başlayıb. Sərgidə ölkəmiz Mədəniyyət Nazirliyinin təşkilatçılığı ilə 36 kvadratmetr sahədə xüsusi dizaynlı stendlə və 200 adda, 400 nüsxədən çox kitabla təmsil olunur. Mədəniyyət Nazirliyi ilə yanaşı "Azərnəşr" və "Şərq-Qərb" nəşriyyatları və "Azərkitab" kitab ticarəti mərkəzi sərgidə iştirak edir.
Nazirlikdən AZƏRTAC-a bildirilib ki, sərgidə 30-dan çox ölkədən 150 və Rusiya Federasiyasından 300-dən çox nəşriyyat-poliqrafiya müəssisəsi, eləcə də digər aidiyyəti qurumlar öz nəşr məhsullarını nümayiş etdirir. Əvvəlki illərlə müqayisədə daha geniş sahədə və xüsusi dizaynda qurulmuş Azərbaycan stendi və burada nümayiş olunan kitablar sərgiyə gələnlərin diqqətini çəkir, ziyarətçilər tərəfindən böyük marağa səbəb olur. Çoxsaylı kitabsevərlə yanaşı, müxtəlif nəşriyyatların, təşkilatların nümayəndələri də stendimizə maraq göstərir, onlarla görüş zamanı mümkün gələcək əməkdaşlıq imkanları müzakirə edilir.
MDB-nin "Kitab sənəti" beynəlxalq müsabiqəsinin qalibləri sərgi çərçivəsində sentyabrın 6-da diplomlarla təltif olunacaq.
Sərgi sentyabrın 8-dək davam edəcəkdir.
Türk Mədəniyyəti və İrsi Fondunun növbəti layihəsi – “Turk Discovery” yutub platforması
Kukla Teatrında növbəti xeyriyyə aksiyası
Qulu Ağsəsin “Görsən üşüyürsən...” adlı şeirlər kitabı çap olunub
Bakıda VI Ümumdünya Mədəniyyətlərarası Dialoq Forumu keçiriləcək