×
A
A
A
Sazlamalar

“Qarabağ”-APOEL oyunu zamanı azarkeşlərin rəqib komandaya hücum çəkməsi haqqında məlumatlar həqiqətə uyğun deyil

Bakı, 14 avqust, AZƏRTAC
Sosial şəbəkələrdə və bəzi idman informasiya saytlarında UEFA Çempionlar Liqasının üçüncü təsnifat mərhələsi çərçivəsində Bakıda keçirilən “Qarabağ”-APOEL oyunu zamanı azarkeşlərin rəqib komandaya hücum çəkməsi ilə bağlı yayılan məlumatlar həqiqətə uyğun deyil.
Bakı Şəhər Baş Polis İdarəsinin mətbuat xidmətinin rəisi, polis mayoru Elşad Hacıyev
AZƏRTAC-a bildirib ki, oyun yüksək təhlükəsizlik şəraitində başa çatıb, heç bir neqativ hal baş verməyib. Digər xarici ölkələrdə keçirilən oyun zamanı baş verən insidenti dünənki oyuna “transformasiya” etmək cəhdi ictimai fikri çaşdırmaq məqsədi daşıyır.
“Qəti olaraq bildiririk ki, Bakıda keçirilən oyun zamanı Ermənistan bayrağı dalğalandırılmayıb, bununla bağlı hər hansı fakt qeydə alınmayıb. Əgər varsa, Bakı Şəhər Baş Polis İdarəsinə təqdim olunmasını tövsiyə edirik. Həmin məlumatlar tərəfimizdən qəti şəkildə təkzib olunur. Bu məlumatlar polis orqanları ilə heç bir dəqiqləşdirmə aparandan, əsassız yazılıb, iddialar dezinformasiyadır. Mətbuat nümayəndələrinə tövsiyə olunur ki, həqiqətə uyğun olmayan məlumatların yayılmaması və bu kimi halların gələcəkdə təkrarlanmaması məqsədilə həmin məlumatları dərc etməzdən əvvəl informasiyanın düzgünlüyünü dəqiqləşdirsinlər”, - deyə E.Hacıyev vurğulayıb.

Sosial 2019-08-14 11:24:00