Bakı, 10 avqust, AZƏRTAC

Ölkəmizdə Qarabağ uğrunda şəhid olan döyüşçülərin ailələrinə göstərilən qayğı böyük razılıq doğurur. Xüsusilə bu il həmin təbəqədən olanlara birdəfəlik ödəmələrin verilməsi, sosial müavinətlərin artırılması, mənzil və avtomobil bağışlanılması dövlətin onlara olan diqqət və qayğısının daha bir ifadəsidir.
“Atam İlham 1994-cü il yanvarın 31-də Ağdam rayonu uğrunda gedən döyüşlərdə şəhidlik zirvəsinə yüksəlib. Onun itkisindən sonra ailəmiz çox çətinlik və məhrumiyyətlərlə üzləşib. O vaxt çox kiçik olsam da, atasızlığın hər üzünü görmüşəm”, - deyə şəhid övladı Nizami Balıyev AZƏRTAC-a danışıb.
Azərbaycanda həyata keçirilən sosial-siyasi və hüquqi islahatlar əslində dövlət başçısının rəhbərliyi ilə həyata keçirilən inkişaf konsepsiyasının əsas tərkib hissəsidir. Şəhid ailələrinin maddi-rifah halının yüksəldilməsi üçün atılan addımlar cəmiyyətdə böyük razılıqla qarşılanır.
Şəhid övladı fikrinə davam edərək deyib: “Atamı itirsəm də, özümü tənha hiss etməmişəm. Dövlətin qayğısını, xeyirxah insanların maddi və mənəvi dəstəyini həmişə üzərimizdə hiss etmişik. Dövlət öz vətəndaşına sahib duranda özünü daha da ürəkli və cəsarətli hiss edirsən, belə bir ölkədə yaşadığın, onun sakini olduğuna görə qürur duyursan. Bizə göstərilən bu qayğı və dəstək məndə atamın müqəddəs yolda şəhid olduğuna bir daha əminlik yaradıb. Doğrudan da, torpaq uğrunda axıdılan qan heç vaxt unudulmur”.
Balıyevlər ailəsinə olan dövlət dəstəyindən danışan Nizami fikrini belə yekunlaşdırıb: “Bu ilin əvvəlində birdəfəlik müavinətlə təmin olunduq. İlin ikinci yarısında isə Saray qəsəbəsində ailəmizə üçotaqlı mənzil verildi. Mart ayından şəhid ailəsi üçün verilən müavinət də 150 manata qaldırılıb. Ailəmizə olan bu qayğıya görə həm anam Mənsurənin, nənəm Dünyanın adından, eləcə də öz adımdan dövlət başçımıza minnətdarlığımı bildirirəm”.