Bakı, 25 iyul, AZƏRTAC

Nəqliyyat, Rabitə və Yüksək Texnologiyalar Nazirliyinin Məlumat Hesablama Mərkəzi (MHM) cari ilin ilk yarısında 20 min 376 elektron imza sertifikatı istifadəyə verib. Bu sertifikatlardan 13 min 484-ü dövlət qurumlarının, 4 min 458-i hüquqi və fiziki şəxslərin, 2 min 402-si vətəndaşların, 32-si isə qeyri-rezidentlərin payına düşüb.
MHM-dən AZƏRTAC-a bildirilib ki, son bir ayda 2 min 850 e-imza sertifikatları istifadəyə verilib. Belə ki, iyunda dövlət qurumlarına 1742, hüquqi və fiziki şəxslərə 822, vətəndaşlara 286 e-imza sertifikatı verilib. MHM-in Milli Sertifikat Xidmətləri Mərkəzi tərəfindən istifadəyə verildiyi gündən cari ilin iyulun 1-dək ümumilikdə 187 min 314 elektron imza sertifikatı əldə olunub. Onlardan 104 min 802-si dövlət qurumlarına, 46 min 34-ü hüquqi və fiziki (sahibkarlar) şəxslərə, 36 min 478-i vətəndaşlara təqdim edilib.
Elektron imza istifadəçilərinin sayının artması aparılan əməliyyatların sayının artmasına da təsir göstərir. Son bir ildə dövlət qurumları tərəfindən 8 milyon 992 min 379, hüquqi və fiziki şəxslər tərəfindən 1 milyon 645 min 574, vətəndaşlar tərəfindən 37 min 340 olmaqla, ümumilikdə 10 milyon 675 min 293 autentifikasiya və e-imza əməliyyatı aparılıb. Təkcə cari ilin ikinci rübündə aparılan əməliyyatların ümumi sayı 3 milyon 973 min 472 olub. Onlardan dövlət qurumlarının payına 3 milyon 507 min 322, hüquqi və fiziki şəxslərin payına 453 min 930, vətəndaşların payına isə 12 min 220 autentifikasiya və elektron imza əməliyyatı düşüb.
Qeyd edək ki, e-imza virtual məkanda şəxsiyyəti müəyyənləşdirmə vasitəsidir. Azərbaycan Respublikasının mövcud qanunvericiliyinə əsasən, elektron imza ilə imzalanan elektron sənədlər əl imzası ilə imzalanan və möhürlənən sənədlərə bərabər tutulur.