×
A
A
A
Sazlamalar

Hesablama Palatasında nəzarət tədbirləri üzrə auditor hesabatları müzakirə olunub

Bakı, 18 iyul, AZƏRTAC

Hesablama Palatasının kollegiya iclasında həyata keçirilmiş bir sıra nəzarət tədbirləri üzrə auditor hesabatları müzakirə edilib.
Palatanın mətbuat xidmətindən AZƏRTAC-a bildirilib ki, hesabatlar dövlət büdcəsindən Azərbaycan Türkiyədəki səfirliyinin saxlanılmasına ayrılan vəsaitlərin istifadəsinə və dövlət rüsumunun tutulmasına və “Azəristiliktəchizat” ASC-nin dövlət büdcəsindən ayrılmış vəsaitlərin istifadəsinə dair məsələləri əhatə edib.
Kollegiya iclasında hər bir nəzarət tədbiri üzrə auditor hesabatları barədə müvafiq qərar qəbul olunub. Nəzarət tədbirlərinin nəticələri üzrə qərarın icrasını təmin etmək məqsədilə aidiyyəti qurumlara kollegiya qərarının və auditor hesabatının göndərilməsi, Milli Məclisə müvafiq məlumatın təqdim olunması qərara alınıb.
Kollegiyada bu ilin 6 ayında kənar dövlət maliyyə nəzarətinin nəticələri üzrə Hesablama Palatasının qəbul etdiyi kollegiya qərarlarının icra vəziyyəti barədə auditorların məruzəsi dinlənilib, müvafiq tapşırıqlar verilib, eyni zamanda, iş planı ilə nəzərdə tutulmuş kənar dövlət maliyyə nəzarəti tədbirləri ilə bağlı proqramlar müzakirə olunaraq təsdiqlənib.
İclasın sonunda Prezident İlham Əliyevin 2019-cu il 22 iyun tarixli Sərəncamına əsəsən, Hesablama Palatasının bir sıra əməkdaşlarına dövlət qulluğunda səmərəli fəaliyyətlərinə görə təltif olunduqları “Tərəqqi” və “Dövlət qulluğunda fərqlənməyə görə” medalları təqdim edilib.

İqtisadiyyat 2019-07-18 16:45:00