Naxçıvan, 18 iyul, AZƏRTAC

Ailə əməyinə əsaslanan fərdi təsərrüfatların yaradılmasına kömək göstərilməsi məqsədilə Naxçıvan Muxtar Respublikası Əmək və Əhalinin Sosial Müdafiəsi Nazirliyi tərəfindən Şərur, Babək, Ordubad, Culfa, Şahbuz, Kəngərli və Sədərək rayonları üzrə, ümumilikdə, 21 aztəminatlı ailə müəyyənləşdirilib və həmin ailələrin məşğulluqlarını təmin etmək üçün müvafiq tədbirlər görülüb.
AZƏRTAC-ın Naxçıvan bürosu xəbər verir ki, bununla əlaqədar keçirilən tədbirdə çıxış edən Naxçıvan Muxtar Respublikası Əmək və Əhalinin Sosial Müdafiəsi naziri Nicat Babayev muxtar respublikada aztəminatlı ailələrə göstərilən dövlət qayğısından, onların məşğulluğunun təmin olunması istiqamətində həyata keçirilən tədbirlərdən danışıb.
Sonra aztəminatlı ailə təmsilçilərinə verilən aktivlərlə bağlı sənədlər təqdim olunub.
Qeyd edək ki, aztəminatlı ailələrdən 14-nə yanında balası olan iribuynuzlu, 3-nə yanında balası olan 10 baş xırdabuynuzlu mal-qara, birinə 10 yeşik arı ailəsi, birinə yer şumlayan mini aqreqat, birinə musiqi avadanlıqları, birinə isə dərzi avadanlıqları və materialları verilib.