Siyəzəndə 200 hektar sahədə badam bağları salınıb VİDEO
Siyəzən, 18 iyul, Elxan Yusifli, AZƏRTAC
Siyəzəndə rayonunda 200 hektar sahədə badam bağları salınıb.
AZƏRTAC-ın bölgə müxbiri xəbər verir ki, badam bağları “Samur-Abşeron suvarma sisteminin yenidən qurulması” layihəsinin icrası nəticəsində rayonda yeni istifadəyə verilən suvarılan torpaqlarda əkilib. Rayon ərazisində meliorativ tədbirlərin həyata keçirilməsi əvvəllər əkin üçün uyğun olmayan geniş torpaq sahələrini əkinəyararlı edib. Qapalı suvarma şəbəkəsinin istifadəyə verilməsi yeni salınan badam bağlarının dayanıqlı su təminatına imkan verir.
Təsərrüfatçı Tural Sərdarov bildirib ki, gələcəkdə badam bağlarının sahəsini daha da artırmaq nəzərdə tutulub. “Köhnə kanallarla su verə bilmədiyimiz sahələrə indi yüksək təzyiqli su vermək mümkündür. Damlama üsulundan istifadə edərək geniş sahələri əkməyə müvəffəq olduq. Rayon ərazisində yeni suvarma kanallarının çəkilməsi əkin sahələrinin artmasına səbəb olub”, - deyə təsərrüfatçı diqqətə çatdırıb.
Dünya bazarında badama böyük tələbat var və bir çox ölkədə əsas valyuta gətirən məhsullardan sayılır. Azərbaycanda isə ötən illərə kimi mövcud badam bağlarının sahəsi 1000 hektara yaxın olub. Onların çoxu Naxçıvan Muxtar Respublikasında yerləşir.
“Samur-Abşeron suvarma sisteminin yenidən qurulması” layihəsi çərçivəsində həyata keçirilən işlər nəticəsində Siyəzən rayonunda 6 min 972 hektar suvarılmayan sahə ilk dəfə su ilə təmin olunub. Bununla yanaşı, layihəyə görə 5 min 165 hektar mövcud suvarılan torpaqların su ilə təminatı da yaxşılaşdırılıb.
Siyəzən rayonu ərazisində mövcud suvarılan torpaqların su ilə təminatının yaxşılaşdırılması və yeni suvarılan torpaqların istifadəyə verilməsi məqsədilə görülən işlər, ümumilikdə, 13 min hektara yaxın sahəni əhatə edəcək.
Rayonun əsas suvarma mənbəyi Samur-Abşeron kanalı, Taxtakörpü-Ceyranbatan kanalı, Gilgilçay və Ataçay çaylarıdır. Qısa vaxt ərzində 12 min hektardan çox əraziyə suyu vaxtında və itkisiz çatdırmaq məqsədilə 1685 ədəd hidrotexniki qurğu, 198 min 286 metr uzunluğunda qapalı supaylayıcı şəbəkə, üzərində 118 ədəd hidrotexniki qurğu olan 24 min 103 metr uzunluğunda beton üzlüklü açıq suvarma kanalı və 2 min 300 hektar ərazini əhatə edən 26 kilometr açıq, 121 kilometr isə qapalı drenaj şəbəkəsi çəkilib.
Otuza yaxın şəhid övladı Ağbulaq İstirahət Mərkəzində istirahət edib
Qızılhacılı kəndinin sakinləri doğma yurdlarının qaytarılmasının sevincini yaşayırlar
Şəkidə “Şahin” hərbi-idman oyununun zona birinciliyinin qalibi müəyyənləşib
Naxçıvanda 1969-1987-ci illərdə 21 iri sənaye müəssisəsi istifadəyə verilib
Baş Prokurorluq tərəfindən Astara rayonunda təmizlik aksiyası təşkil olunub