Bakı, 17 iyul, AZƏRTAC 

İyulun 17-də Azərbaycan Dillər Universitetinin (ADU) Dil və tərcümə xidmətləri mərkəzində Avrasiya Universitetinin Tərcümə kafedrasının bir qrup ingilis dili müəllimi üçün təşkil olunmuş TKT (Teaching Knowledge Test) təlimi yekunlaşıb.
ADU-dan AZƏRTAC-a bildirilib ki, təlimin sonunda iştirakçılara universitet rəhbərliyi tərəfindən sertifikatlar təqdim olunub.
Qeyd edək ki, TKT təlimində iştirakçılar, ilk növbədə, ixtisas biliklərini artırırlar. Bu təlim müəllim peşəsinə başlayanlar üçün çox gərəklidir. Belə ki, TKT gənc müəllimlərə metodikanın əsaslarını daha sistemli və müasir tələblərə uyğun şəkildə təqdim edir. Təlimin üstünlüklərindən biri də sonda iştirakçıların beynəlxalq sertifikat əldə etmək imkanıdır.