Bakı, 8 iyul, AZƏRTAC

Cari ilin birinci yarısında Energetika Nazirliyində inzibati xətalarla bağlı 469 işə baxılıb.
Nazirlikdən AZƏRTAC-a bildirilib ki, bunlardan 435-i təbii qaz, 34-ü isə elektrik enerjisi ilə bağlı olub. Təbii qazla bağlı 121 iş üzrə təqdim edilmiş materiallar düzgün tərtib olunmadığından aidiyyəti üzrə geri göndərilib.
Energetika Nazirliyi tərəfindən Beyləqan, Şəmkir, Gədəbəy, Quba, Kürdəmir, Salyan, Neftçala, Cəlilabad və digər rayonlarda aparılmış yoxlamalar nəticəsində Azərbaycan Respublikasının İnzibati Xətalar Məcəlləsinin müvafiq maddələri ilə təbii qazın talanması nəticəsində az miqdarda ziyan vurulmasına görə 128 iş üzrə, təbii qazdan istifadə qaydalarının pozulmasına görə 19 iş üzrə inzibati tənbehvermə haqqında qərar verilib. 167 iş üzrə isə inzibati icraata xitam verilməsi haqqında qərar qəbul edilib.
Altı ayda Mingəçevir, İmişli, Şabran, Lənkəran, Qəbələ, Ağdaş, Ucar, Qazax və digər bölgələrdə aparılmış yoxlamalara əsasən, İnzibati Xətalar Məcəlləsinin müvafiq maddələri ilə elektrik enerjisinin talanması nəticəsində az miqdarda ziyan vurulmasına görə 17 iş üzrə, elektrik enerjisindən istifadə qaydalarının pozulmasına görə 12 iş üzrə, elektrik enerjisinin istehsalı, nəqli və istehlakı haqqında uçot və hesabatın təhrif olunmasına və ya vaxtında təqdim edilməməsinə görə 2 iş üzrə, elektrik enerjisi xətlərinin qanunsuz olaraq kəsilməsinə və ya qanunvericilikdə istehlakçıya yazılı bildirişin göndərilməsi tələb olunan hallarda yazılı bildiriş göndərilmədən elektrik enerjisinin verilməsinin dayandırılmasına görə isə 3 iş üzrə inzibati tənbehvermə haqqında qərar qəbul olunub.
Hesabat dövründə bütün qərarların nazirlik tərəfindən “ASAN Ödəniş” sistemində yerləşdirilməsi təmin edilib.