Azərbaycan Dövlət
İnformasiya Agentliyi

A
A
A
Sazlamalar

İstanbulda səsvermənin ilkin nəticələri açıqlanıb

İstanbul, 23 iyun, AZƏRTAC

İyunun 23-də İstanbul Böyükşəhər bələdiyyəsi sədri vəzifəsinə keçirilən təkrar səsvermə ilə bağlı ilkin nəticələr açıqlanmaqdadır. Nəticələrə görə, namizəd Əkrəm İmamoğlu səsvermədə iştirak edənlərin təxminən 50-53 faizinin etimadını qazanaraq irəlidədir. Bildirilir ki, səsvermədə orta seçici fəallığı 80 faiz civarındadır.
AZƏRTAC xəbər verir ki, əsas mübarizə hakim Ədalət və İnkişaf Partiyasının (AKP) namizədi, sabiq Baş nazir və Türkiyə Böyük Millət Məclisinin əvvəlki sədri Binəli Yıldırım ilə Cümhuriyyət Xalq Partiyasının (CHP) namizədi, İstanbulun Bəylikdüzü bələdiyyəsinin keçmiş sədri Əkrəm İmamoğlu arasında olub.
Qeyd edək ki, televiziya kanallarının yaxın vaxtda seçkiyə dair azad şəkildə verilişlər yaymağa başlayacaqlar.
Türkiyə Ali Seçki Komissiyası tərəfindən günün sonunadək səsvermənin ilkin nəticəsi barədə məlumat veriləcəyi gözlənilir.
Bülletenlərin sayılması davam edir.


Sabir Şahtaxtı
AZƏRTAC-ın xüsusi müxbiri
İstanbul

Dünya 2019-06-23 20:42:00