Bakı, 20 iyun, AZƏRTAC

Hava Nəqliyyatında Baş Gömrük İdarəsinin əməkdaşları külli miqdarda müxtəlif məhsulun qanunsuz yolla ölkə ərazisinə gətirilməsi cəhdinin qarşısını alıblar.
Dövlət Gömrük Komitəsinin Mətbuat və İctimaiyyətlə Əlaqələr İdarəsindən AZƏRTAC-a bildirilib ki, Dubay-Bakı aviareysi ilə gələn Azərbaycan vətəndaşı fiziki şəxslər tərəfindən verilən sadələşdirilmiş bəyannamə tərtib edərək özü ilə 2 ədəd noutbuk, 2 ədəd saat və 2 ədəd mobil telefon gətirdiyini bəyan edib. Lakin yoxlama zamanı vətəndaşa məxsus baqajlardan bəyannamədə göstərilən əşyalardan başqa, gömrük orqanına bəyan edilməyən xeyli miqdarda elektronika malları – 13 qulaqlıq, 4 səsgücləndirici, 5 fotoaparat, 5 oyun diski, 1 plata, 4 “driver”, 27 hard disk, 3 ştrix kod oxuyucu, 3 videokart, 13 RAM, 44 fleş-kart, 2 proyektor və 15 ətir, həmçinin düzgün bəyan edilməyən 6 qol saatı aşkarlanıb.
Faktla bağlı araşdırma aparılır.