×
A
A
A
Sazlamalar

Ümumdünya Turizm Təşkilatının sessiya iştirakçılarına ölkəmizin turizm potensialı tanıdılır

Bakı, 19 iyun, AZƏRTAC

İyunun 19-da BMT-nin Ümumdünya Turizm Təşkilatının İcraiyyə Şurasının 110-cu sessiyasında iştirak etmək üçün ölkəmizə gələn üzv dövlətlərin rəsmiləri Qobustan və Şamaxı şəhərlərində olublar.
Dövlət Turizm Agentliyindən AZƏRTAC-a bildirilib ki, Qobustan ərazisində yerləşən “Diri baba” türbəsinə ziyarətlə başlayan turda qonaqlara türbənin tarixi, orijinal memarlıq forması, dekorativ və zərif bəzək elementləri barədə ətraflı məlumat verilib.
Daha sonra qonaqlar Cənubi Qafqazda ən qədim məscidlərdən hesab olunan Şamaxı Cümə məscidində olublar, onlar məscidin tarixi, memarlıq üslubu, naxış və ornamentləri barədə məlumatlandırılıblar.
Tur çərçivəsində qonaqlar Şamaxı şəhərinin mövcud turizm potensialı, xidmət obyektlərinin fəaliyyət istiqamətləri və şərabçılıq ənənələri ilə tanış olublar.
Xatırladaq ki, iyunun 18-də BMT-nin Ümumdünya Turizm Təşkilatının İcraiyyə Şurasının 110-cu sessiyası işini başa çatdırıb. 37 ölkədən və 5 beynəlxalq təşkilatdan rəsmi dövlət nümayəndələrinin iştirak etdiyi və iki gün davam edən sessiya “İrsimizi qoruyaq: sosial, mədəni və ekoloji davamlılıq” mövzusuna həsr olunub.

Turizm 2019-06-19 16:58:00