Bakı, 14 iyun, AZƏRTAC
Bu il Ümumdünya Poçt İttifaqının 145 illiyi qeyd olunacaq.
“Azərpoçt” MMC-dən AZƏRTAC-a bildirilib ki, bu münasibətlə Ümumdünya Poçt İttifaqı tərəfindən bir sıra layihələr həyata keçiriləcək. Yubiley tədbirləri çərçivəsində İttifaqın baş ofisi yerləşdiyi ərazinin həyətində ağac əkiləcək. Eyni zamanda, 9 oktyabr - Ümumdünya Poçt Gününə həsr olunan ənənəvi mərasim baş tutacaq. Həmin gün 22 təsisçi dövlətin nümayəndələri Bern müqaviləsinin imzalandığı binaya dəvət olunacaq.
Qeyd edək ki, Azərbaycan 1993-cü ilin aprelində Ümumdünya Poçt İttifaqının üzvlüyünə qəbul olunub. “Azərpoçt” MMC beynəlxalq poçt bağlamalarına dair beynəlxalq müştəri xidmətləri sistemi vasitəsilə hazırda dünyanın 173 ölkəsi ilə əməkdaşlıq edir.