×
A
A
A
Sazlamalar

Qəbələ: baramaçılıqda bu il üçün hədəf 20 tondur

Qəbələ, 23 may, Mustafa Dadaşov, AZƏRTAC

Builki mövsümdə Qəbələ rayonunda yaş barama istehsalının ötən illə müqayisədə iki dəfədən çox artırılaraq, 20 tona çatdırılması nəzərdə tutulur. Barama yetişdirilməsi ilə əlaqədar 114 kümçü ailəsi ilə müqavilə bağlanılıb, onlara 500 qutu, yəni 9,5 kiloqram ipəkqurdu paylanılıb. Ümumiyyətlə, cari mövsümdə Qəbələdə baramaçılıq sahəsində 250-dən çox kənd sakininin məşğulluğu təmin olunub.
Bu barədə AZƏRTAC-ın bölgə müxbirinə Qəbələ Dövlət Aqrar İnkişaf Mərkəzinin bitkiçilik sektorunun müdiri Elimdar Şərifov məlumat verib.
Qurum rəsmisi bildirib ki, ipəkqurdunun yemləndirilməsi təlimata uyğun aparılır.
Sektor müdirinin məlumatına görə, baramaçılığın gələcək inkişafını təmin etmək və onun yem bazasını möhkəmləndirmək məqsədilə son üç ildə rayon ərazisində 258 min ədəd tut tingi əkilib. Əkilən tinglərin 110 mini intensiv tipli tut bağlarının salınması məqsədilə Çin Xalq Respublikasından ölkəmizə gətirilərək calaq olunmuş tinglər, qalanları isə yerli tut tingləridir.
Xatırladaq ki, ötənilki mövsümdə qəbələli kümçülər 260 qutu ipəkqurdunun bəslənilməsi ilə məşğul olub, 9,3 ton yaş barama istehsal ediblər.

Kənd təsərrüfatı 2019-05-23 12:56:00