Bakı, 20 may, AZƏRTAC

Mayın 22-də Nizami Kino Mərkəzində “Balans” milli rəqəmsal studiyasında bərpa edilmiş “Mateo Falkone” filmi yeniləşmiş versiyada tamaşaçılara təqdim olunacaq.
Mədəniyyət Nazirliyindən AZƏRTAC-a bildirilib ki, filmin nümayişi görkəmli Azərbaycan rejissoru Tofiq Tağızadənin 100 illik yubileyi ilə əlaqədar tədbirlər çərçivəsində reallaşacaq.
Prosper Merimenin novellası əsasında çəkilmiş film milli kinomuzun qızıl fonduna daxildir. Tofiq Tağızadə, Rasim Ocaqov, Kamil Nəcəfzadə, Qara Qarayev, Rüfət Şabanov, Niyazi, Nodar Şaşıqoğlu, Tamilla Ağamirova, Ceyhun Mirzəyev, Anatoli Falkoviç və Hacımurad Yegizarov kimi Azərbaycan mədəniyyəti və kinosunun dahi simaları bu filmin yaranmasına öz töhfələrini veriblər.