Bakı, 20 may, AZƏRTAC

“Neftçi” futbol klubunun haitili yarımmüdafiəçisi Soni Mustivar ölkəsinin milli komandasına dəvət olunub.
AZƏRTAC klubun saytına istinadla xəbər verir ki, mayın 25-dən iyulun 8-dək yığmanın düşərgəsində olacaq 29 yaşlı yarımmüdafiəçi iyunun 7-də Çili millisi ilə yoldaşlıq oyununda iştirak edəcək. Bununla yanaşı, futbolçu “CONCACAF Qızıl Kubok” turniri çərçivəsində iyunun 17-də Bermud adaları, dörd gün sonra Nikaraqua, iyunun 25-də isə Kosta-Rika seçmələri ilə oyunlarda meydana çıxacaq.
Soni Mustivar 2013-cü ildən çıxış etdiyi Haiti milli komandasının heyətində 16 oyunda 2 dəfə fərqlənib.