Vyetnamlı qonaqlar Qəbələdən xoş təəssüratla ayrılıblar
Qəbələ, 18 may, Mustafa Dadaşov, AZƏRTAC
Vyetnam Sosialist Respublikasının Quanq Nam əyaləti Xalq Komitəsinin Mədəniyyət, İdman və Turizm İdarəsinin rəisi Nquyen Thanh Honqın başçılıq etdiyi nümayəndə heyəti Qəbələ rayonunda səfərdə olub.
AZƏRTAC-ın bölgə müxbiri xəbər verir ki, nümayəndə heyətinin üzvləri əvvəlcə Heydər Əliyev Konqres Mərkəzində rayon rəhbərliyi ilə görüşüblər. Vyetnamlı qonaqlara Qəbələnin tarixi, mədəniyyəti, turizm potensialı, sosial-iqtisadi sahədə həyata keçirilən layihələr barədə ətraflı məlumat verilib. Bildirilib ki, 900 il Qafqaz Albaniyasının paytaxtı olmuş qədim Qəbələ Azərbaycanın tarixinin ən parlaq səhifələrini təşkil edir. Cəlbedici turizm diyarı olan Qəbələ, həm də beynəlxalq mədəniyyət mərkəzi kimi ölkənin ictimai həyatında mühüm rol oynayır. Hər il bu şəhərdə bir sıra beynəlxalq tədbirlər, musiqi festivalları keçirilir, idman yarışları, sərgilər təşkil olunur.
Vyetnam nümayəndə heyətinin başçısı Nquyen Thanh Honq Qəbələnin füsunkar təbiətinin onlarda xoş təəssürat yaratdığını vurğulayıb. Vyetnamlı qonaq Qəbələ ilə Quanq Nam əyaləti arasında bir çox sahələrdə əməkdaşlığın yaranacağına əminliyini bildirib.
Görüşdə Vyetnamın iqtisadiyyatını və mədəni həyatını əks etdirən videoçarx nümayiş etdirilib.
Səfər çərçivəsində vyetnamlı qonaqlar “Tufandağ” Qış-Yay Turizm İstirahət Kompleksi, stend atıcılığı kompleksi, “Gilan” Qida Şəhərciyi və Qəbələ Mədəniyyət Mərkəzi ilə tanış olublar.
Nquyen Thanh Honqın başçılıq etdiyi nümayəndə heyəti Qəbələdən xoş təssüratlarla ayrılıb.
Otuza yaxın şəhid övladı Ağbulaq İstirahət Mərkəzində istirahət edib
Qızılhacılı kəndinin sakinləri doğma yurdlarının qaytarılmasının sevincini yaşayırlar
Şəkidə “Şahin” hərbi-idman oyununun zona birinciliyinin qalibi müəyyənləşib
Naxçıvanda 1969-1987-ci illərdə 21 iri sənaye müəssisəsi istifadəyə verilib
Baş Prokurorluq tərəfindən Astara rayonunda təmizlik aksiyası təşkil olunub