Bakı, 19 aprel, AZƏRTAC
Nəqliyyat, Rabitə və Yüksək Texnologiyalar Nazirliyinin də dəstək verdiyi "NETTY 2019" milli internet mükafatı müsabiqəsində iştirak üçün müraciətlərin qəbuluna başlanılıb.
Nazirlikdən AZƏRTAC-a bildirilib ki, "NETTY" mükafatı ölkəmizin informasiya texnologiyaları üzrə ən yaxşı layihələrini, faydalı veb-resurslarını və IT sahəsində fəaliyyət göstərən peşəkarlarını aşkarlamaq və dəyərləndirmək məqsədilə artıq 15-ci dəfədir keçirilir.
Cari il aprelin 17-də "www.netty.az" saytında başlanan iştirak üçün ərizə qəbulu mayın 24-dək davam edəcək. Ərizələrin qeydiyyatı ödənişlidir.
Veb-saytlar, proqramlar, sosial şəbəkə səhifələri və onlayn video layihələr mükafatın namizədləri ola bilərlər.
Builki müsabiqə "Dövlət", "İqtisadiyyat və Biznes", "Təhsil və Elm", "Mədəniyyət və Yaradıcılıq", "İnformasiya və Xəbərlər", "Elektron Xidmətlər və Ticarət", "İdman və Sağlamlıq", "Cəmiyyət və Ailə", "Turizm və İstirahət", "Azərbaycan", "İlin mobil proqramı", "Virtual münsiflər heyətinin seçimi", "Ən yaxşı onlayn-video layihə", "Sosial şəbəkələrdə ən yaxşı səhifə", "İlin IT hadisəsi", "Azərbaycanda IT-nin inkişafının zənginləşdirilməsinə görə" nominasiyaları üzrə baş tutacaq. Mayın 24–31-də mükafatın nominantlar siyahısını formalaşdıran Ekspert Şurasının və Virtual münsiflər heyətinin səsverməsi keçiriləcək.
İyunun 1-dən NETTY Akademiyası nominantlar sırasından qaliblərin müəyyən edilməsi üçün səsverməyə başlayacaq. Qaliblərə müsabiqənin əsas mükafatı olan "NETTY" heykəlciyi təqdim edilir.