Güclü külək və leysan yağışları Gürcüstanda ciddi fəsadlar törədib
Tbilisi, 18 aprel, AZƏRTAC
Güclü küləklə müşayiət olunan yağışlar və dağlıq ərazilərə yağan qar Gürcüstanda ciddi fəsadlar törədib.
AZƏRTAC xəbər verir ki, güclü külək nəticəsində paytaxt Tbilisidə bir neçə ağac aşıb, avtomobillərə, evlərə və digər infrastruktura ciddi ziyan dəyib.
Elektrik xətləri qırılıb, bəzi rayonlara elektrik enerjisinin verilməsində problemlər yaranıb.
Əlverişsiz hava şəraiti Gürcüstanın bölgələrində də fəsadlara səbəb olub. Tetriskaro, Dmanisi, Kaspi və Qori rayonlarında külək ağacları aşırıb, bəzi evlərə ziyan dəyib. Leysan yağışları nəticəsində kiçik çaylar məcrasından çıxıb, həyətyanı ərazilər və kənd təsərrüfatı sahələri su altında qalıb.
Gürcüstandan Rusiyaya gedən yeganə avtomobil magistralında minik avtomobili yoldan çıxaraq qar uçqununa düşüb. Xilasedicilər avtomobildəki insanları xilas ediblər. Heç kim xəsarət almayıb.
Yuxarı Lars yolunda avtomobillərin hərəkətində fasilələr yaranıb.
Sinoptiklər əlverişsiz hava şəraitinin aprelin 23-dək davam edəcəyi barədə xəbərdarlıq ediblər.
Yaxın günlərdə Gürcüstan ərazisində güclü külək, leysan yağışları və dağlıq ərazilərdə qar yağacağı bildirilir.
Xətayi Əzizov
AZƏRTAC-ın xüsusi müxbiri
Tbilisi
Türkiyənin vitse-prezidenti: Daxili istehlakın ifrat artımı ölkənin iqtisadi inkişafına zərbə vurur
Şröder: Putinlə şəxsi münasibətlərim Ukraynada sülh prosesinə fayda verə bilər
RF XİN: Ermənistan kollektiv Qərbin son dərəcə təhlükəli planlarının alətinə çevrilir