Azərbaycan Dövlət
İnformasiya Agentliyi

A
A
A
Sazlamalar

Belqradda 6 şairə beynəlxalq poeziya festivalı çərçivəsində “Nəsimi 650 il” diplomu təqdim edilib

Bakı, 19 mart, AZƏRTAC

Belqradda keçirilmiş “Anastasiya Günləri” beynəlxalq poeziya festivalı çərçivəsində öz fəaliyyəti ilə xüsusi fərqlənən 6 şairə əsas mükafat qismində Azərbaycanın dahi şairi İmaməddin Nəsiminin 650 illik yubileyinə həsr edilmiş, “Nəsimi 650 il” adlı diplomlar təqdim edilib.
Azərbaycanın Serbiyadakı səfirliyinin təşəbbüsü və dəstəyi, eləcə də Serbiya Kral Akademiyasının təşkilatçılığı ilə keçirilmiş festivalda müxtəlif ölkələrdən yüzdən artıq şair iştirak edib.
Səfirlikdən AZƏRTAC-a bildirilib ki, hər iki ölkənin dövlət himnlərinin səslənməsi ilə açıq elan edilən festivalda çıxış edən Serbiya Kral Akademiyasının prezidenti Draqan Damyanoviç sözügedən festivalın keçirilməsində göstərilən dəstəyə görə səfirliyimizə təşəkkürünü ifadə edib. Hər iki ölkənin ədəbiyyat və incəsənətə xüsusi rəğbətini olduğunu qeyd edən D.Damyanoviç, müasir mərhələdə Serbiya-Azərbaycan əməkdaşlığının aktual cəhətlərinə toxundu, dövlətlərarası münasibətlərin strateji tərəfdaşlıq səviyyəsində olduğunu vurğulayıb.
Tədbirdə çıxış edən səfir Eldar Həsənov ədəbiyyat aləmində xüsusi yeri olan bu festivalın yüksək səviyyədə təşkil edildiyini, əsas mükafat qismində Azərbaycanın dahi şairi Nəsiminin adını daşıyan diplomların təqdim edilməsindən qürur duyduğunu və belə mədəni, ədəbi tədbirlərin mədəniyyət sahəsində Azərbaycan və Serbiya, həmçinin festival iştirakçısı olan digər ölkələrlə əlaqələrinin daha da canlanmasına öz töhfəsini verəcəyindən əmin olduğunu bildirib. Dünya ədəbiyyatına və mədəniyyətinə öz töhfələrini vermiş poeziya sənətimizin Nəsimi, Füzuli, Qətran Təbrizi, Nizami Gəncəvi, Xaqani Şirvani, Məhsəti Gəncəvi, Mikayıl Müşfiq, Hüseyn Cavid, Bəxtiyar Vahabzadə kimi ölməz korifeylərinin yüksək sənətkarlıqla yazılmış əsərlərinin sonrakı dövrlərdə müasir şairlərimizin ilham qaynağı olduğunu, həmçinin serb şairləri Petar Neqoş, Branko Radiçeviç, Yovan Zmay, Aleksa Şantiç, Yovan Duçiç, Milan Pakiçin yaradıcılığının da əhəmiyyətli rol oynadığını söyləyib.
Mədəniyyət, incəsənət və poeziyanın xalqları birləşdirən bir körpü olduğunu deyən səfir, festivala və təşkilatçılara gələcək fəaliyyətlərində uğurlar arzuladı.
Gün ərzində davam edən festival yerli və xarici KİV nümayəndələri tərəfindən geniş işıqlandırılıb.

Mədəniyyət 2019-03-19 18:37:00