Azərbaycan Dövlət
İnformasiya Agentliyi

A
A
A
Sazlamalar

“Abşeron Şərab” şirkəti məhsullarının Almaniyaya ixracına dair ilkin razılıq əldə edib

Bakı, 19 mart, AZƏRTAC 

İqtisadiyyat Nazirliyinin dəstəyi, Azərbaycanda İxracın və İnvestisyaların Təşviqi Fondunun (AZPROMO) təşkilatçılığı ilə şərab və digər spirtli içkilərin istehsalı ilə məşğul olan 10 Azərbaycan şirkəti öz məhsullarını Almaniyanın Düsseldorf şəhərində təşkil olunan “Prowein 2019” beynəlxalq sərgisində “Made in Azerbaijan” vahid ölkə stendində təqdim edir.
Nazirliyin mətbuat xidmətindən AZƏRTAC-a bildirilib ki, Azərbaycan şərabları sərgiyə gələnlər və idxalatçı şirkətlər tərəfindən maraqla qarşılanır, ixraca dair müzakirələr aparılır.
Aparılan müzakirələrin nəticəsi olaraq, artıq “Abşeron Şərab” şirkəti öz məhsullarının Almaniyaya ixracına dair ilkin razılıq əldə edib.
Bundan başqa, “Naiqin Ko-Tovuz Baltiya” və “Aspi Aqro” şirkətləri istehsal etdikləri şərabların Almaniya, Fransa və Niderlanda, “Şərq Ulduzu”, “Aqro-Azərinvest” şirkətləri isə Norveç, Almaniya və Çinə ixracına dair danışıqlar aparıb.
Sərgi bu gün başa çatır.

İqtisadiyyat 2019-03-19 18:01:00